Syılyqtan shyqqan shý: Atyraýda bilim bólimi 600 syılyqty qaıta jasaqtaýǵa ýaqyt berdi

ATYRAÝ. KAZINFORM – Áleýmettik jelilerde taraǵan vıdeoda almatylyq kásipker Atyraý qalalyq bilim bólimi uıymdastyrǵan memlekettik satyp alý konkýrsynda jeńiske jetkenimen, jetkizilgen 600 jańa jyldyq syılyqtyń qabyldanbaýyna baılanysty 2 mln 700 myń teńgege shyǵynǵa batqanyn málimdegen edi. Alǵashynda taýardyń qabyldanbaıtynyn aıtqan bilim bólimi endi kásipkerge olqylyqty joıý úshin ýaqyt berdi.

Kásipkerdiń aıtýynsha, ol jańa jyldyq syılyqtardy jetkizý boıynsha memlekettik tenderge qatysyp, bir syılyqtyń baǵasyn 4 990 teńge dep usynyp, ózge qatysýshylardan 10 teńgege arzan baǵa kórsetken.

Alaıda kásipker Atyraýǵa taýardy tapsyrý úshin kelgen kezde, bilim bólimi syılyqtardy qabyldaýdan bas tartqan. Jalpy jetkizilgen ónim kólemi – 600 dana balalarǵa arnalǵan jańa jyldyq syılyq. Onyń sózinshe, tek qarjylyq shyǵynǵa ushyrap qana qoımaı, ózin memlekettik satyp alýlarǵa qatysý quqyǵynan aıyratyn josyqsyz jetkizýshiler tizilimine engizý týraly habar alǵan.

Atyraý oblystyq bilim berý basqarmasynyń bergen resmı málimedemesine súıensek, ár jıyntyqta 17 túrli tátti, olardyń salmaǵy men quramy talapqa saı bolýy tıis edi. Al jetkizilgen syılyqtardyń ishinde shamamen 10 ǵana tátti bolǵan jáne jalpy salmaǵy belgilengen normadan tómen bolǵan.

Kásipker taýardy 30 jeltoqsan kúni ákelgen. Kelisimshart talaptary oryndalmaǵandyqtan, qarajat jergilikti bıýdjetke qaıtarylǵan.

Bul másele áleýmettik jeli arqyly kóptiń nazaryn aýdaryp, qyzý talqyǵa tústi. Atyraý qalalyq bilim bólimi kásipker kelisimshartqa sáıkes 10 qańtarǵa deıin syılyqty tehnıkalyq sıpattamaǵa sáıkes daıyndap berý kerektigin málimdedi. Bilim bólimi syılyq talapqa saı kelse, qabyldap, tizimge sáıkes balalarǵa taratamyz dep otyr.