«Syılyqqa páter alyp, jalǵan jobalarǵa ruqsat bergen»: Almaty ýrbanıstıka basqarmasynyń basshysyna qandaı aıyp taǵyldy
ALMATY. KAZINFORM – Almaty sotynda Qalalyq josparlaý jáne ýrbanıstıka basqarmasynyń burynǵy basshysyna qatysty aldyn ala tyńdaý bastaldy. Qylmystyq is Almatynyń qylmystyq ister jónindegi mamandandyrylǵan sotynda qaralyp jatyr.
Sot aldynda 6 aıyptalýshy jaýap beredi. Olardyń qatarynda Almashan Ahmedjanovtan basqa buryn qalanyń Jer qatynastary basqarmasynyń basshysy bolǵan Ardaq Samambetov te bar.
Dınastııa turǵyn úı kesheni
Tergeý Ahmedjanov 2020-2023 jyldary quzyretine sáýlet-josparlaý tapsyrmalaryn berý jáne eskızdik jobalardy maquldaý qyzmetteri kiretin laýazymdy atqarǵan tusta óziniń jáne ózge uıymdar men tulǵalardyń paıdasy úshin, atap aıtqanda, M.Abdıbaeva jáne «MDi-Max Group» JShS-na «Ermensaı» yqsham aýdany, 4 mekenjaıy boıynsha (JK Dınastııa) nysanaly maqsatyn ózgertpeı ári kadastrlyq qunyn tólemeı qurylys bastaýǵa ruqsat qaǵazdaryn bergenin anyqtady.
- Aıtylǵan is-áreketterdiń kesirinen merdiger quny 152 mıllıon teńge bolatyn kadastrlyq tólemdi tólegen joq, - dedi prokýror.
Regis Hills kottedj qalashaǵy
Sol ýaqytta Ahmedjanov «Ermensaı» yqsham aýdany, 3 mekenjaıynda Regis Hills kottedj qalashaǵynyń qurylysyn bastaý úshin «BI Almaty Project» JShS-yna (jańa ataýy «BI Development Almaty») nysanaly maqsatyn ózgertpeı ári kadastrlyq qunyn tólemeı ruqsat qaǵazdaryn berdi. Kottedj qalashaǵynyń josparyna 11 taýnhaýs, 3 kottedj, 2 vılla jáne 1 qonaq úı kirgen. Atalǵan is-áreketterdiń kesirinen merdiger kompanııa 111 mıllıon teńge kadastrlyq tólem tólemegen.
«River park» turǵyn úı kesheni
Sondaı-aq, kóptegen zańbuzýshylyqtardy bile tura Ahmedjanov óziniń qyzmetin paıdalanyp, qalada 5 kópqabatty turǵyn úı keshenin salýǵa ruqsat bergen. Al merdiger kompanııalardan óz paıdasy úshin zańsyz salynyp jatqan turǵyn úılerden páter talap etken. Osylaısha qoldanysqa berilgen 3 turǵyn úıdiń árqaısysynan onyń týystaryna bir-bir páterden berilgen. Olardyń biri – Medeý aýdanynda Tıan-Shanskaıa kóshesi, 9G mekenjaıynda «Korporatsııa ART Medıa» JShS-y qurylys júrgizgen «River park» turǵyn úı kesheni.
- 2019 jyly Ahmedjanov «Korporatsııa ART Medıa» JShS qurylysshysyna Tıan-Shanskaıa kóshesi, 9G boıyndaǵy turǵyn úı kesheniniń qurylysyna arhıtektýralyq-josparlaý tapsyrmasyn berdi. Sol jyly qurylys normalarynyń buzylýy men eskızdik jobanyń is júzinde sáıkes kelmeýin bile tura qurylysshyǵa «River Park»TK qurylysyna arnalǵan eskızdik jobany negizsiz maquldaıdy. Sonymen qatar ol bas merdigerden óziniń kúıeý balasy I. úshin salynyp jatqan turǵyn úı keshenindegi páterge aıtarlyqtaı jeńildik talap etti. Osylaısha memlekettik bıliktiń bedeline nuqsan keltirdi, – dedi memlekettik aıyptaýshy.
Tergeý derekteri boıynsha, «Korporatsııa ART Medıa» JShS men I. arasynda 9,6 mln teńgege «River Park» TK-degi úsh bólmeli páterdi (70,5 sharshy metr) satyp alý-satýdyń aldyn ala sharty jasalǵan. 2023 jyly mundaı páter 31,5 mıllıon teńgege baǵalanǵan.
«Elite life» turǵyn úı kesheni
2021 jyly Ahmedjanov Qajymuqan kóshesi boıynda «Elite life» turǵyn úı kesheniniń qurylysyn bastaýǵa «Atrıým plıýs» JShS-nyń sáýlet-josparlaý tapsyrmasyna kelisim berdi. Tergeý málimetine sáıkes, aıyptalýshy obektiniń qurylysy «qyzyl jolaqta» ornalasqan jer ýchaskesinde salý josparlanǵanyn, sondaı-aq ǵımarat bıiktigi men ózge de normalarynyń buzylǵanyn bilgen.
- Bul rette Ahmedjanov qurylys kompanııasy basshylarynyń biri Ch.-men kezdeskende óziniń qyzmettik jaǵdaıynyń mańyzdylyǵyn túsinip, odan salynyp jatqan turǵyn úıdegi páterge aıtarlyqtaı jeńildik talap etti, – dedi prokýror.
Osydan keıin kompanııanyń quryltaıshysy «Elite Life» kesheninen Ahmedjanovqa páter syılaıdy. Tergeý málimetteri boıynsha, 2021 jyldyń 27 mamyrynda «Atrıým plıýs» JShS men Ahmedjanovtyń ákesi arasynda 38,2 mln teńgege «Elite life» turǵyn úıinde páterdi satyp alý-satý sharty jasalǵan. Biraq bul qarajat satyp alýshy tarapynan tólenbegen. Sondaı-aq memlekettik aıyptaýshy 2022 jyly Ahmedjanovtyń anasy jáne kúıeý balasy 38 mıllıon jáne 25 mıllıonǵa eki páterdiń satyp alý-satý shartyn «Atrıým plıýs» kompanııasymen tek qaǵaz júzinde jasaǵanyn atap ótti.
Jalǵan ınvestıtsııalyq jobalar
Tergeý málimetteri boıynsha, Almashan Ahmedjanov pen Ardaq Samambetov 2020-2023 jyldary óńirlik úılestirý keńesin aınalyp ótip, jekelegen kásipkerlerdiń múddelerin qoldap, olarǵa memlekettik qordan jer ýchaskesin zańsyz ıemdenýge járdem kórsetti. Jer ýchaskelerine saýda-sattyq rásimderi jasalmaı, kadastrlyq quny boıynsha satylǵan.
- Kásipkerler ózderin qyzyqtyratyn ýchaskelerdi tańdap, 2020 jyly óz baqylaýyndaǵy «ABZ Aqtas» JShS, «T Super Service» JShS, «TMT Invest» JShS kompanııalardyń atynan Almaty ákimdigine ózderi oılap tapqan ınvestıtsııalyq jobalardyń (halyqqa qyzmet kórsetý obektileri, medıtsınalyq ortalyq, saýyqtyrý ortalyqtary) qurylysyna atalǵan jer ýchaskelerin bólý týraly hat joldady. Ahmedjanov olardyń ınvestıtsııalyq jobaǵa jatpaıtynyn bile tura Óńirlik úılestirý keńesimen aqyldaspaı, Qalalyq josparlaý jáne ýrbanıstıka basqarmasynyń atynan olarǵa ınvestıtsııalyq joba retinde kelisim berdi jáne ony basqarmanyń eltańbaly mórmen bekitti, – dedi prokýror.
Ári qaraı úsh kásipker óz jobalaryn Jer qatynastary basqarmasyna jiberdi. Basqarma basshysy Ardaq Samambetov Jer kodeksiniń 48-babyn buza otyryp, óńirlik úılestirý keńesiniń kelisimin almaı, Jer komıssııasynyń oń qorytyndysynyń jobasyn daıyndaýdy tapsyrady.
- Jer komıssııasynda Samambetov pen Ahmedjanov ınvestıtsııalyq jobalar syltaýymen joǵaryda atalǵan jer ýchaskelerin «ABZ Aqtas» JShS, «T Super Service» JShS, «TMT Invest» JShS-yna jalǵa berýge daýys berdi. Eki basshynyń ustanymyn eskere otyryp, jer komıssııasynyń qalǵan músheleri de bul sheshimge qosylady. Nátıjesinde málimdegen jobalardy salý úshin úsh jyl merzimge ýaqytsha óteýli qysqa merzimdi jer paıdalaný quqyǵyn berý týraly sheshim qabyldandy, – dep atap ótti memlekettik aıyptaýshy.
Tergeý málimetine sáıkes, atalǵan jer ýchaskeleri keıinnen úsh kompanııanyń jeke menshigine ótip ketken. Atap aıtqanda, «ABZ Aqtas» JShS «Qazaqfılm» yqsham aýdanyndaǵy jer ýchaskesin naryqtyq quny 80 mln teńge bolǵanyna qaramastan, 5,4 mln teńgege satyp alǵan. Al «T Super Service» JShS Abaı-Prokofev kósheleriniń qıylysyndaǵy naryqtyq quny 118,8 mln teńge bolatyn aýmaqty 13,2 mln teńgege, «TMT Invest» JShS Áýezov aýdanyndaǵy naryqtyq quny 82 mln teńge bolatyn jer ýchaskesin 7,5 mln teńgege satyp aldy. Alaıda atalǵan aýmaqtarda jobada kórsetilgen halyqqa qyzmet kórsetý obektileri salynǵan joq.
Eske salaıyq, 2023 jyly Almatyda zańsyz qurylysqa ruqsat berip kelgen ýrbanıstıka basqarmasynyń basshysy ustalǵan bolatyn.
