Syıaqy saıasatyn qaıta qaramaımyz - «Samuryq-Qazyna» ókili E.Saırovtyń depýtattyq saýalyna pikir bildirdi

«Samuryq-Qazyna» aktsıonerlik qoǵamynyń kooperatıvti basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov Májilis depýtaty Erlan Saırovtyń qorǵa tıesili enshiles kompanııalardyń basshylyq quramǵa syıaqy tóleý saıasaty týraly saýalyna pikir bildirdi, dep habarlaıdy QazAqparat tilshisi.

Ǵıbrat Aýǵanov jazda ǵana qoǵamda rezonans týǵyzyp, túsindirme jumystary júrgizilgen málimettiń kúzde Májilis minberinen qaıta kóterilgenine tańǵalyp otyr.

«Bul másele shilde aıynda aıtylyp, búkil BAQ-qa túsindirme retinde aqparat bergenbiz. Tipti KASE alańynda osy máselege baılanysty baspasóz máslıhatyn da ótkizdik.

Nelikten búgin qoıylǵanyn bilmeımin. Eki aı boldy. E.Saırov myrza qoǵamdyq keńestiń otyrysyna kelgen joq. Ózinen suraıtyn edik. Qoǵamdyq otyrystarda da jaýap bergenbiz», - deıdi ol.

Aktsıonerlik qoǵam ókili depýtat saýalynda atalǵan kompanııa qyzmetkerleriniń aılyǵy men syıaqylaryn tómendetýge bolmaıdy degen paıym aıtty.

«Nege tómendetýge bolmaıdy? Bizdiń kompanııalarymyz – ulttyq kompanııalar. Jalpy «Samuryq-Qazynada» 270-ten astam enshiles kompanııa bar. Ár kompanııa – naryq. Mysaly, bir kompanııanyń basshysyn alaıyq. Ol laýazymǵa taǵaıyndalý úshin tıisti bilimi bolý kerek. Jaýapkershilik alady. 5 myń, 10 myń jumysshyǵa jaýapty bolady. Onyń báriniń bıznes kórsetkishterin, qarjylyq kórsetkishterin oryndaý kerek. Qazaqstannyń damýyna úles qosatyn, soǵan naqty laıyqty basshy bolý kerek. Naqty laıyqty basshy bolý úshin, naqty laıyqty jalaqy bolý kerek», - deıdi aktsıonerlik qor dırektory.

Aıtýynsha, basshylar men menedjerlerdiń aılyǵy men syıaqysyn tómendetse, qazirgi qyzmetterinde turaqtap qalmaýy múmkin.

«Bizdegi problemanyń biri mynadaı: Bizdiń jaqsy menedjerlerimizdi ishki naryq, ishki bıznes básekelestik jolmen tartyp alady. Jalaqysyn bizdegiden kóterip usynady da, biz daıyndaǵan mamandardy alyp ketedi. Sol sebepti basshylarǵa tóleıtin syıaqyny tómendetý máselesin koporatıvtik reglamentter sheshedi. Ár kompanııanyń sharttary, erejeleri bar. Biz operatsııalyq máselelerge kire almaımyz. Ár kompanııaǵa «basshylarǵa mynansha tóle» dep mindet qoıa almaımyz. Sebebi lımıt bar. Lımıtterdi qaıta qarap jatqan joqpyz. Biraq biz 2022 jyldan bastap eń tómen jalaqy alatyn jumysshylardyń aılyǵyn Qazaqstandaǵy ortasha jalaqyǵa deıin kóterý baǵytynda úlken jumys atqaryp jatyrmyz», - dedi Ǵıbrat Aýǵanov.

Eske salsaq, Májilis depýtaty «Samuryq-Qazyna» qory qurylymyndaǵy kompanııalardyń qarjylyq operatsııalaryn tekserýdi suraǵan bolatyn.