Syıaqy máselesin daýǵa aınaldyrǵan Qarjymın qyzmetkerlerine qansha syıaqy tóleıdi
ASTANA. KAZINFORM – Qarjy mınıstrligi Kazinform saýalyna joldaǵan jaýabynda vedomstvo mamandaryna bir jylda qansha syıaqy tólengenin málim etti.
«Syıaqylardy tóleý úshin bıýdjetten arnaıy qarajat bólinbeıdi. Memlekettik uıymdardyń syıaqylardy berý somasy tıisti erejede belgilengen ári mınıstrlikti qosa alǵanda, árbir memlekettik organnyń únemdeýine baılanysty jáne ony bıýdjettik baǵdarlamanyń ákimshisi derbes júrgizedi. Osy rette syıaqylardy tóleýge baılanysty sizge bıýdjettik baǵdarlamalardyń ákimshilerine tikeleı habarlasý qajet. 15 myń qyzmetker jumys isteıtin Qarjy mınıstrligi boıynsha 2023 jyly jylyna shamamen 4 jalaqyǵa teń syıaqy berildi (Naýryz meıramy, Qazaqstan Respýblıkasynyń Konstıtýtsııasy kúni, QR Respýblıka kúni, QR Táýelsizdik kúni)», - dep jazylǵan jaýapta.
Budan vedomstvodaǵy mınıstrden bastap mamanǵa deıingi qyzmetshiniń bári bir jylda tórt ret ózine taǵaıyndalǵan aılyq eńbekaqy mólsherinde syıaqy alyp otyrǵanyn túsinýge bolady.
«Barlyq deńgeıdegi laýazymdyq qyzmetkerlerdi syıaqymen marapattaý sharttary qaǵıdalarymen belgilengen. Qazirgi tańda mınıstrlik atalǵan qaǵıdalardy basshylyqqa alady. Memlekettik uıymdardyń qyzmetkerlerine syıaqy tóleý mólsheri qaǵıdalarmen belgilenip, árbir memlekettik organnyń, onyń ishinde mınıstrliktiń únemdelgen qarajatyna baılanysty, bıýdjettik baǵdarlama ákimshisimen óz betinshe júzege asyrylady», - delingen mınıstrlik málimetinde.
Mınıstrlik mamandary aıtyp otyrǵan qaǵıda Úkimettiń №1127 qaýlysy arqyly bekitilgen.
Sondaı-aq Qarjy mınıstrligi memlekettik qyzmetshilerge qandaı shyǵyndardy únemdeýden qalǵan qarajat syıaqy retinde úlestiriletinin túsindirdi.
«Syıaqylardy tóleý úshin bıýdjetten arnaıy qarajat bólinbeıdi. Memlekettik uıymdardyń syıaqylardy berý somasy tıisti erejede belgilengen. Árbir memlekettik organnyń únemdeýine baılanysty jáne ony bıýdjettik baǵdarlamanyń ákimshisi derbes júrgizedi», - dep jazylǵan jaýapta.
Sonymen memlekettik organdarda syıaqy berý men materıaldyq kómek kórsetý sharalary mynandaı shyǵyndardy únemdeý esebinen iske asady:
- issaparlar men úı-jaılardy jalǵa alý shyǵyndaryn únemdeýden;
- kommýnaldyq qyzmetter men baılanys qyzmetteriniń shyǵyndaryn únemdeýden;
- kólik qyzmetteri men ony kútip ustaýdyń, qyzmet kórsetýdiń shyǵyndaryn únemdeýden;
- ǵımarattar men úı-jaılardy, jabdyqtardy jáne basqa da negizgi quraldardy aǵymdaǵy jóndeý shyǵyndaryn únemdeýden;
- negizgi jalaqy men (bos oryndar, aýrýhana paraqtary jáne t. b.), basqa da taýarlar satyp alý shyǵyndaryn únemdeý esebinen.
Eske salsaq, Qarjy mınıstri Mádı Takıev memlekettik qyzmetshilerge únemdelgen bıýdjet qarjysyn syıaqy túrinde berýge tyıym salynatyny týraly málimet aıtyp, qoǵamda biraz pikirtalas týdyrǵan edi.
Tipti Prezıdent Qasym-Jomart Toqaev ta osy másele týraly pikir bildirdi.