Qytaı ShYU bankaralyq birlestik múshelerine 1,4 mlrd dollar nesıe beredi

ASTANA. KAZINFORM — Qytaı ShYU-nyń bankaralyq qaýymdastyǵyna (HBA) múshe elderge 10 mıllıard ıýan (1,4 mıllıard dollar) kóleminde jańa nesıe beredi. Bul týraly Tıantszınde ótip jatqan ShYU sammıtinde sóz sóılegen Qytaı tóraǵasy Sı Tszınpın aıtty.

Qytaı tóraǵasynyń aıtýynsha, Qytaıdyń ShYU-ǵa múshe basqa elderdiń ekonomıkasyna salǵan ınvestıtsııasy 84 mıllıard dollardan asty.

Sı Tszınpın Shanhaı Yntymaqtastyq Uıymynyń Damý bankin tezirek qurýǵa shaqyrdy.

Sonymen birge ShYU elderiniń ekonomıkasynyń kólemi 30 trıllıon dollarǵa jaqyndady.

Aıta keteıik, 2005 jyldyń qazan aıynda Máskeýde ShYU-ǵa múshe memleketterdiń Úkimet basshylary keńesiniń otyrysy barysynda Shanhaı yntymaqtastyq uıymy sheńberindegi bankaralyq yntymaqtastyq týraly kelisimge qol qoıylǵan bolatyn.

Mehanızmniń negizgi maqsaty — ShYU-ǵa múshe memleketterdiń úkimetteri qoldaıtyn ınvestıtsııalyq jobalardy qarjylandyrý jáne banktik qyzmet kórsetý.

Buǵan deıin Sı Tszınpın ShYU álemdegi eń iri aımaqtyq uıymǵa aınalǵanyn aıtty.

Aıta keteıik, 30 tamyzda Prezıdent Qasym-Jomart Toqaev Shanhaı yntymaqtastyq uıymynyń sammıtine qatysý úshin Tıantszın qalasyna bardy.

Memleket basshysy QHR Tóraǵasy Sı Tszınpınmen kelissóz júrgizdi.

Osy oraıda Kazinform tilshisi ótken bir jyldyń ishinde Qazaqstan Qytaı ekonomıkasyna qalaı kirikkenin sholyp kórdi.