Sı Tszınpın álemdegi saýda soǵysyn djýnglı zańdaryna teńedi

ASTANA. KAZINFORM — Qytaı Halyq Respýblıkasynyń tóraǵasy Sı Tszınpın «Ortalyq Azııa-Qytaı» sammıtinde álemdegi saýda soǵysyn djýnglı zańdary ústemdik qurǵan ortaǵa teńedi.

— Halyqaralyq ahýaldaǵy buryn-sońdy bolmaǵan ózgerister jahandyq silkinister men ózgeristerdiń jańa kezeńin bastap berdi. Teńdik, ádildik, ózara paıda jáne ózara tabys qaǵıdattaryn qaltqysyz ustaný ǵana búkil álemdegi beıbitshilikti qoldap, birlesken órkendeýge qol jetkizýge múmkindik beredi. Tarıf pen saýda soǵysynda jeńimpazdar bolmaıdy, — dedi ol sammıtte.

Onyń paıymdaýynsha, protektsıonızm, gegemonııaǵa qushtarlyq ondaı baǵyt ustanǵan eldiń ózin de, ózge memleketterdi de shyǵynǵa ushyratady.

— Men tarıh dıirmenin keri aınaldyrýǵa bolmaıtynyn, tek alǵa jyljý mańyzdy ekenin únemi aıtyp kelemin. Bizge ydyraǵan álem emes, birtutas álem kerek. Adamzat djýnglı zańdarynyń ústemdigine moıyn usynbaı, ortaq taǵdyrǵa toptasý aýanynda damýy kerek, — dedi Sı Tszınpın.

Aıta keteıik, elordada «Ortalyq Azııa — Qytaı» ІІ sammıti ótip jatyr. Іs-sharaǵa Memleket basshysy Qasym-Jomart Toqaev, QHR tóraǵasy Sı Tszınpın, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Serdar Berdimuhamedov jáne Tájikstan Prezıdenti Emomalı Rahmon qatysyp otyr.

«Ortalyq Azııa — Qytaı» І sammıti 2023 jyldyń 19 mamyrynda Qytaıdyń Sıan qalasynda ótken edi.