Sıtsılııadaǵy mýzeıden Madonna men Hrıstos beınelengen kartınalar urlandy
ASTANA. KAZINFORM — Sıtsılııadaǵy Messına qalasynyń Óńirlik mýzeıinen Qaıta órleý dáýiriniń kórnekti sýretshisi Antonello da Messınanyń tórt týyndysy urlandy, dep habarlaıdy Kazinform agenttigi TASS-qa silteme jasap.
Mádenıet mekemesiniń dırektsııasy habarlaǵandaı, qylmyskerler 15 tamyz kúni keshke mýzeıge kirip, kúzet júıesi men dabyldy óshirgen. Keıin olar tórt aǵash paneldi alyp ketken.
Urlanǵan týyndylardyń arasynda San-Gregorıo polıptıhiniń bes paneliniń úsheýi jáne Bogorodıtsa men Hrıstos beınelengen eki jaqty aǵash panel bar.
— 15 tamyz kúni keshke beıtanys adamdar mýzeıge kirip, kúzet júıesi men dabyldy óshirgen. Olar eki jaqty panel ornalasqan arnaıy vıtrınany buzyp, San-Gregorıo polıptıhiniń bes paneliniń úsheýin alyp ketken, — delingen mýzeı habarlamasynda.
Qazir oqıǵa ornynda mamandar jumys istep jatyr. Olardyń aıtýynsha, qylmyskerler polıptıhti tolyqtaı alyp ketip úlgermegen.
Polıptıh jergilikti monastyr úshin jasalǵan. Týyndy, sonyń ishinde 1908 jylǵy jer silkinisinen keıin, aıtarlyqtaı zaqymdalyp, birneshe ret restavratsııalanǵan.
La Repubblica gazetiniń málimetinshe, bir jaǵynda Madonna men sábı, ekinshi jaǵynda Hrıstos beınelengen eki jaqty aǵash panel Londondaǵy iri Christie’s aýktsıon úıinen satyp alynǵan.
Antonello da Messına (shamamen 1429–1479 jyldar) — erte Qaıta órleý dáýiriniń Sıtsılııadaǵy kórnekti sýretshileriniń biri. Uzaq jyldar boıy onyń týyndylary araldan shyǵarylmaǵan. Tek osy ǵasyrda ǵana kartınalary kórmelerge qoıylý úshin basqa elderge shyǵaryla bastaǵan.
Sýretshiniń búginge deıin shamamen 40 týyndysy saqtalǵan. Jaqynda Sotheby’s aýktsıon úıinen onyń «Tikendi táj kıgen Hrıstos» (Ecce Homo) atty aǵashqa salynǵan týyndysy 12 mln dollarǵa satyp alynǵan.
