Sıtsılııada orman órti órship tur: tótenshe jaǵdaı jarııalanyp, turǵyndar evakýatsııalandy
ASTANA. KAZINFORM – Italııanyń Sıtsılııa aralynda aptap ystyq pen ekpindi jeldiń saldarynan iri orman órtteri órship, bılik tótenshe jaǵdaı rejımin jarııalady. Turǵyndar qaýipsiz jerge kóshirilip jatyr, dep habarlaıdy BELTA.
Sky TG24 telearnasynyń málimetinshe, Sıtsılııada qalyptan tys ystyq pen qatty jelden týyndaǵan orman órtteri keń aýmaqty sharpyǵan.
Tilsiz jaý júzdegen gektar jerdi kúlge aınaldyryp, áli de taralýyn toqtatqan joq. Kúrdeli jaǵdaıǵa baılanysty aralda tótenshe jaǵdaı rejımi engizilip, júzdegen turǵyn óz úılerin tastap ketýge májbúr boldy.
Órtti sóndirýge órt sóndirý qyzmeti, azamattyq qorǵanys kúshteri jáne avıatsııa jumyldyryldy. Alaıda qutqarýshylardyń barlyq kúsh-jigerine qaramastan, órtti tolyq aýyzdyqtaý ázirge múmkin bolmaı otyr.
Sıtsılııada aýa temperatýrasy 45 gradýstan asyp ketken. Al qatty jel órtti sóndirý jumystaryn edáýir qıyndatyp otyr.
Eń kúrdeli jaǵdaı Palermo qalasy mańynda qalyptasty. Munda jalyn turǵyn úılerge jaqyndaǵan. Órtke baılanysty birqatar jol jabylyp, elektr qýatynyń berilýinde irkilister baıqalyp otyr. Sonymen qatar egistik alqaptary men záıtún baqtary otqa orandy.
Osyǵan deıin Frantsııadaǵy órtke baılanysty 5 myńǵa jýyq adam evakýatsııalanǵany týraly jazdyq.
