Sıtsılııa jaǵalaýynan júzdegen amfora tıelgen ejelgi keme tabyldy
ASTANA. KAZINFORM – Sıtsılııa jaǵalaýynda Ejelgi Rım dáýirine jatatyn kemeniń qaldyqtary tabyldy. Boljam boıynsha, ol bizdiń dáýirimizge deıingi II–I ǵasyrlarǵa tıesili. Bul týraly Euronews jazdy.
Italııa Mádenıet mınıstrliginiń málimetinshe, keme Sıtsılııanyń batysyndaǵy Madzara-del-Vallo jaǵalaýynan shamamen úsh teńiz mıli qashyqtyqta, 46 metr tereńdikten anyqtalǵan.
Teńiz túbinen júzdegen amfora, qorǵasynnan jasalǵan eki zákir shtogy jáne sol materıaldan jasalǵan taǵy bir qurylym tabyldy.
Italııanyń Mádenıet mınıstri Alessandro Djýlı bul oljany sońǵy jyldardaǵy eń mańyzdy sýasty arheologııalyq jańalyqtarynyń biri dep atady.
– Teńiz bizge tarıhymyzdyń qundy bólshekterin qaıtarýdy jalǵastyryp keledi. Madzara-del-Vallo mańyndaǵy keme Jerorta teńizin órkenıetter toǵysyna aınaldyrǵan adamdar, baǵyttar men saýda baılanystary týraly syr shertedi. Onyń tarıhyn ashyp, qoǵamǵa tanystyrý úshin zertteý jalǵasady, – dedi Alessandro Djýlı.
Ejelgi kemeni jeke tulǵadan túsken aqparattan keıin sý astynda jumys isteıtin karabınerler anyqtaǵan.
Endi aýmaqta qujattaý jáne egjeı-tegjeıli zertteý jumystary júrgiziledi. Mamandar arheologııalyq konteksti qalpyna keltirip, tarıhı nysandy qorǵaýǵa qajetti sharalardy qabyldamaq.
Eske sala ketsek, buǵan deıin Shveıtsarııada sý astynan IV ǵasyrdaǵy rım kópiriniń qaldyqtary tabylǵanyn jazdyq.
Sondaı-aq Bolgarııada túkti mamonttyń súıekteri tabyldy.
