Sısem ata qorymyna 10 myń adam jınaldy

AQTAÝ. QazAqparat - Mańǵystaýdaǵy ejelgi qorymdardyń biri Sısem Ata basynda as berilip, mádenı sharalar ótti, dep habarlaıdy QazAqparat tilshisi.

Jalpyhalyqtyq sharaǵa 130 kıiz úı tigilip, on myńnan astam adam jınalǵan.

Eki kúnge sozylǵan sharada el aqsaqaldary men azamattary sóz sóılep, astyń uıymdastyrylý maǵynasyn túsindirdi.

«Búgingi berilip jatqan as – myzǵymas birliktiń aıshyqty úlgisi. Oıy ortaq múdde arnasynda toǵysqan el azamattarynyń jemisti jobasy. Birlik pen berekege bastaý bolar ıgi shara budan ári de óz jalǵasyn tabaryna senimim mol», - dedi Mańǵystaý oblysynyń ákimi Serikbaı Trumov.

Shara aıasynda boz kilemde palýandar qazaq kúresinen óner kórsetti. Odan soń at qulaǵynda oınaǵan shabandozdar oshaq-báıgede baq synady. Eki kúnge sozylǵan shara aqyndar músháırasy men jyr keshine ulasty.

36 shaqyrymdyq at báıgede birinshi bolyp almatylyq Qoıanqasqa» degen arǵymaq keldi.

Al, palýan kúresiniń bas júldesin mańǵystaýlyq «Qarabýra» degen laqap aty bar Nurdáýlet Jarylǵapov jeńip aldy. Qarabýranyń qarsylastary qazaqsha kúres, sambo men dzıýdodan Azııa men Eýropa chempıondyǵyn alǵan myqty sportshylar boldy.

Jalpy aıta ketsek, as berýdiń maqsaty – ata-baba rýhyna taǵzym etý, jas urpaqqa úlgi-ónege kórsetý.