«Sisco» men «Philips» Astanada óz jobalaryn júzege asyrmaq nıette
ASTANA. QazAqparat - ASTEX Astana Smart City forým-kórmesi qarsańynda Áset Isekeshev aqparattyq tehnologııalar salasyndaǵy Sisco (AQSh, jelilik tehnologııalar salasyndaǵy álemdik jetekshi), Philips (tehnologııalyq taýarlardyń aýqymdy assortımentine ıe gollandııalyq kompanııa), sondaı-aq, AıTı (Reseı, korporatıvtik aqparattyq júıeler jasaý, jańartý jáne súıemeldeý úshin sheshimder men qyzmetterdiń barlyq spektrin usynatyn kópbeıindi AT-holdıng) sııaqty transulttyq kompanııalarmen kezdesti.
Qala ákimdiginiń saıtynyń habarlaýynsha, kezdesýde Astana Smart City baǵdarlamasy aıasynda basty maqsaty jelilik jaryqtandyrý bazasynda aqyldy qala servısterin damytý úshin qalalyq ınfraqurylym jelisin qurýdyń birinshi kezegin iske qosý bolyp tabylatyn jobalardy iske asyrý máselesi talqylandy.
«Kósheni jaryqtandyrý» jobasy boıynsha 2017 jyly eski úlgidegi shamdardy 100 paıyz sapaly aq jaryq beretin kóshe shamdarymen (25 000 asa) tolyq almastyrý jáne jaryqtandyrýdy basqarýdyń 516 shkafyn jańǵyrtý josparlanǵan. Bul elektr energııasy men jaryqtandyrý júıelerin paıdalanýǵa jumsalatyn shyǵyndy jáne jaryqtandyrý júıesin paıdalanýdy 60% azaıtýǵa, sondaı-aq qaladaǵy qaýipsizdikti arttyrýǵa múmkindik beredi.
TMD-da qashyqtyqtan monıtorıngteý jáne jaryqtandyrý júıesiniń jumysyn basqarý múmkindigimen aqyldy qalany basqarý servısteriniń City Digital Program platformasy alǵash ret engizilmek. Sonymen qatar osy jobanyń negizinde IoT (Internet of Things) málimetter taratý jelisi jasalady, ol aqyldy qalanyń 10-nan astam qosymsha servısin, sonyń ishinde ekoqurylǵylar, TKSh málimetterin jınaý jáne óńdeý, qoqys jınaý tetikteri, open Wi-Fi, kóshelerdegi júktemeniń trafıgin taldaý, aıaldamalardaǵy aqparattyq kıoskiler men basqalaryn damytýǵa jol ashady.
Aıta keteıik, joba memlekettik-jeke menshik áriptestik mehanızmi boıynsha jeke ınvestıtsııanyń esebinen júzege asyrylady. Investor qarjysy elektr energııasyn tutynýdy únemdeýdiń esebinen qaıtarylady.
Kezdesý barysynda talqylanǵan ekinshi joba - Jelilik Akademııanyń ashylýy, onda CISCO kompanııasy Smart Astana jobalaryn iske asyrý úshin ІT salasynda kadrlar daıyndaýmen jáne qaıta daıarlaýmen aınalysatyn bolady.
Úshinshi joba - «E-kıosk», bul jobanyń arqasynda elorda turǵyndaryna qashyqtyqtan memlekettik qyzmetter kórsetý múmkindigi týady.
