Syrttan kirgen avtokólikke negizsiz berilgen 6,5 myńnan astam sertıfıkattyń kúshi joıyldy
ASTANA. KAZINFORM – Memlekettiń retteýshilik fýnktsııalaryn tıimdi kúsheıtetin jáne bıznestiń jaýapkershiligin arttyratyn kez jetti. Bul týraly Úkimet otyrysynda Premer-Mınıstr Oljas Bektenov aıtty.
«Іshki naryqtaǵy taýarlardyń qaýipsizdigi men sapasyn arttyrý máseleleri adam ómiri men densaýlyǵyn qorǵaýdyń negizi sanalady. Sondaı-aq, bul otandyq kásiporyndardyń básekege qabilettiligin arttyrýda, jańa ónimder shyǵarýda mańyzdy ról atqarady. Álemdik tájirıbe kórsetip otyrǵandaı, ekonomıkasy damyǵan memleketter óndiriletin jáne syrttan ákelinetin ónimniń sapasyn baqylap, monıtorıng júrgizý úshin mindetti túrde tehnıkalyq retteý múmkindikterin paıdalanady», - dedi Premer-Mınıstr.
Onyń atap ótýinshe, álemdegi kásipkerlik qyzmet túrleriniń 70 paıyzdan astamy belgili bir dárejede «sapa ınfraqurylymymen» baılanysqan. Tamaq ónerkásibinen bastap kúrdeli mashına jasaýǵa deıingi barlyq salada qaýipsizdik pen sapa talaptary belgilengen. Sondyqtan zerthanalyq zertteýler men synaqtar deńgeıin únemi arttyryp otyrý, ınstıtýttar men ýnıversıtetterdiń ǵylymı áleýetin osy jumysqa jumyldyrý mańyzdy.
«Olardyń jumysy álemdik standarttarǵa saı keletin sapaly ónim óndirýge, syrtqy naryqtarǵa shyǵýǵa járdemdesýge tıis. Sondaı-aq, ónimderi tıisti standarttarǵa saı kelýine bıznestiń ózi de múddeli bolýy kerek ekenin atap ótemin. Buǵan deıin ákimshilik kedergilerdi azaıtý úshin biz ónimderdi, sondaı-aq zerthanalardyń qyzmetin memlekettik baqylaý rásimderin ońaılattyq. Biraq bul jerde múddelerdiń tepe-teńdik prıntsıpi saqtalýǵa tıis. Mysaly, energııa stantsııalarynyń jóndelýin, ónerkásip obektilerinde tipti, attraktsıondardaǵy qaýipsizdikti baqylaý talaptarynyń tómendeýi kerisinshe áser bergenin aıta ketý kerek», - dedi Oljas Bektenov.
Premer-Mınıstr dereginshe, tek bıylǵy jyldyń ózinde osy salada anyqtalǵan buzýshylyqtardyń ósýi 70 paıyzdan asyp ketti.
«Sondaı-aq, ákelinetin avtokólikke negizsiz berilgen 6,5 myńnan astam qaýipsizdik sertıfıkattarynyń kúshin joıýǵa týra keldi. Mundaı jaǵdaılardyń aldyn alý qajet. Biz azamattarymyzdy jalǵan jáne qaýipti ónimderden qorǵaýǵa tıispiz. Sondyqtan memlekettiń retteýshilik fýnktsııalaryn tıimdi kúsheıtetin jáne bıznestiń jaýapkershiligin arttyratyn kez jetti», - dedi ol.
Osy oraıda Úkimet basshysy Saýda jáne ıntegratsııa mınıstri ataǵan usynystardy qoldaıtyndyǵyn jetkizdi.
«Olar zańnamalyq deńgeıde de iske asyrylýǵa tıis. Saýda mınıstrligi múddeli memlekettik organdarmen jáne bıznes-qoǵamdastyqpen birlesip, tıisti túzetýlerdi jedel túrde pysyqtasyn», - dedi Premer-Mınıstr.
