Syrttaǵy aǵaıynnyń tarıhı Otanyna oralǵanyn quptaımyn – Qasym-Jomart Toqaev

ASTANA. KAZINFORM – «Turkistan» gazetine suhbat bergen Memleket basshysy Qasym-Jomart  Toqaev syrttaǵy aǵaıynnyń tarıhı Otanyna oralǵanyn quptaıtynyn aıtty.

- Qandastar máselesine kelsek. Árıne, men syrttaǵy aǵaıynnyń tarıhı Otanyna oralǵanyn quptaımyn. Biraq olardyń qoǵamymyzǵa durys kirigýine qatysty máselelerdi sheshý qajet. Byltyr Qazaqstanǵa 16 myńnan astam qandas kóship kelgen. Sonyń ishinde eńbekke jaramdy azamattardyń on bes paıyzynyń ǵana joǵary bilimi bar. Sol sebepti kóbi Qazaqstandaǵy áleýmettik-ekonomıkalyq ortaǵa beıimdelý barysynda qıyndyqtarǵa tap bolady. Olar negizinen Almaty oblysynyń halyq kóp turatyn aýdandary men aýyldaryna jáne Mańǵystaý oblysynyń Jańaózen qalasyna qonystanǵan. Ortalyq jáne jergilikti bılik, sondaı-aq, quqyq qorǵaý organdary bul jaǵdaıǵa nazar aýdarýǵa májbúr bolyp otyr, - dedi Memleket basshysy.

Prezıdent byltyrǵy suhbatynda Qazaqstanda barlyq azamattyń quqyǵy birdeı ekenin, eshkimge eshqandaı artyqshylyq nemese basymdyq berilmeıtinin aıtqanyn eske saldy.

- Biz órkenıetti, ádiletti memleket quryp jatyrmyz. «Zań ústemdigin» qamtamasyz etý, bilimniń sapasyn arttyrý, mádenıetti bolý, aıanbaı eńbek etý, tártipke bas ııý jáne memlekettik rámizderge qurmetpen qaraý arqyly ǵana osy maqsatqa jetemiz. Elimizdiń bolashaǵy daryndy, bastamashyl ári otanshyl jastardyń qolynda. Men muny únemi aıtyp júremin. Sebebi Memleket basshysy retinde óskeleń urpaqtyń jasampaz qýatyna senemin, - dedi Qasym-Jomart Toqaev.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.