Syrtqy ister mınıstriniń Tájikstanǵa sapary qalaı ótti
ASTANA. KAZINFORM - Tájik tarapynyń shaqyrýymen Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Tájikstan Respýblıkasyna resmı saparmen boldy.
Sapar barysynda QR syrtqy saıası vedomstvosynyń basshysy M.Nurtileýdi Tájikstan Respýblıkasynyń Prezıdenti Emomalı Rahmon qabyldady.
Tájikstan kóshbasshysy eki eldiń ekijaqty formatta da, halyqaralyq óńirlik uıymdar sheńberinde de ózara is-qımylynyń nátıjeli sıpatyn erekshe atap ótti. Qazaq-tájik qarym-qatynastarynyń odaqtas deńgeıi rastaldy. E.Rahmon Qazaqstan Respýblıkasynyń Prezıdenti Qasym-Jomart Toqaevqa izgi tilekteri men sálemin jetkizdi.
Mınıstr M.Nurtileý Tájikstan Prezıdentine Memleket basshysynyń jyly lebizin jetkizip, baýyrlas Tájikstanmen odaqtastyqty odan ári jan-jaqty tereńdetýge degen adaldyǵy men shynaıy nıetin atap ótti.
QR syrtqy saıası vedomstvosynyń basshysy suhbattasyn qazaq-tájik kóp qyrly yntymaqtastyǵynyń ózekti jaı-kúıi men damý perspektıvalary týraly, sondaı-aq joǵary deńgeıdegi ózara saparlardyń qorytyndylary boıynsha qol jetkizilgen ýaǵdalastyqtardyń iske asyrylý barysy týraly habardar etti.
Suhbattastar saýda, energetıka, tsıfrlandyrý, kólik jáne logıstıka, aýyl sharýashylyǵy jáne sý resýrstary sııaqty salalardaǵy tabysty yntymaqtastyqty atap ótti. Ekonomıkalyq jáne ınvestıtsııalyq ózara is-qımyldy odan ári keshendi arttyrýdyń úlken áleýetin atap ótti. Ózara taýar aınalymy sońǵy jyldary turaqty túrde 1 mlrd. dollardan asady.
Óńiraralyq yqpaldasýdy nyǵaıtý, saýda ekonomıkalyq jáne mádenı gýmanıtarlyq yntymaqtastyqty ári qaraı damytý jáne túrli salalarda birlesken jobalardy iske asyrý máselelerine erekshe kóńil bólindi.
Aıta keteıik, 24 qańtarda Syrtqy ister mınıstri Murat Nurtileý Tájikstanǵa jumys saparymen bardy.
Buǵan deıin Túrikmenstan men Tájikstannyń Syrtqy ister mınıstrlikteri «bir Qytaı» qaǵıdatyn qoldady.
Eske sala keteıik, byltyr jeltoqsanda Qyrǵyzstan men Tájikstan qosymsha 12 shaqyrym shekarany bekitti.
