Syrtqy ister mınıstrliginiń qaıtalanatyn fýnktsııalary alynyp tastalady – zań
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine dıplomatııalyq qyzmet máseleleri boıynsha ózgerister men tolyqtyrýlar engizý týraly» Zańy qabyldandy.
Zań jobasynyń negizgi erejeleri artyq egjeı-tegjeıli normalardy alyp tastaýǵa, quqyqtyq olqylyqtardy joıýǵa, sondaı-aq zańnamalyq aktilerde tıisti salanyń negiz qalaýshy maqsattaryn, mindetteri men qaǵıdattaryn belgileýge baǵyttalǵan. Máselen, zańda QR Syrtqy ister mınıstrliginiń qaıtalanatyn fýnktsııalary alynyp tastalady, óıtkeni olar zańǵa táýeldi normatıvtik-quqyqtyq aktilerde qamtylǵan.
«Bul qujatta «Qazaqstan Respýblıkasynyń dıplomatııalyq qyzmeti týraly», «Qazaqstan Respýblıkasynyń halyqaralyq sharttary týraly» jáne «Damýǵa resmı kómek týraly» zańdarda naqtylanǵan, artyq reglamenttelgen, qaıtalanatyn normalardy alyp tastaýǵa baǵyttalǵan túzetýler engizý kózdeledi. Bular qazirgi kezde Syrtqy ister mınıstrligi týraly erejede jáne basqa da zańǵa táýeldi normatıvtik-quqyqtyq aktilerde qarastyrylǵan. Máselen, «Qazaqstan Respýblıkasynyń dıplomatııalyq qyzmeti týraly» Zańynan Mınıstrliktiń 11 fýnktsııasy, 4 artyq naqtylanǵan norma alynyp tastalady, «Damýǵa resmı kómek týraly» Zańynan Mınıstrliktiń 6 fýnktsııasy alyndy, sondaı-aq «Qazaqstan Respýblıkasynyń halyqaralyq sharttary týraly» Zańyna quqyqtyq olqylyqty joıý maqsatynda redaktsııalyq túzetý engizý kózdeledi, - dedi QR Syrtqy ister mınıstriniń orynbasary Álibek Baqaev.
Onyń aıtýynsha, «Quqyqtyq aktiler týraly» Zańynyń talaptaryn eskere otyryp, zań jobasynda tıisti salany retteýdiń maqsattaryn, mindetteri men qaǵıdattaryn belgileý eskerildi.
Májilistiń Halyqaralyq ister, qorǵanys jáne qaýipsizdik komıtetiniń málimetine qaraǵanda, zań jobasyn qarastyrý kezinde depýtattar birqatar túzetý engizdi. Máselen, Qazaqstan Respýblıkasynyń sheginen tys jerlerdegi dıplomatııalyq qyzmet organdaryna bekitilgen memlekettik múlikti ıelikten shyǵarý tártibin bekitý jónindegi quzyretti Úkimetke berý usynylyp otyr.
Sonymen qatar QR SІM qyzmetiniń ereksheligin eskere otyryp, dıplomatııalyq qyzmet ardagerlerine buryn halyqaralyq uıymdarda qyzmet atqarǵan adamdardy teńestirý usynylady. Óıtkeni, QR SІM qyzmetkerleri elimizdiń ortalyq apparaty men shet elderdegi mekemelerinde jumys isteýden basqa, halyqaralyq uıymdarǵa jumysqa jiberiledi, onda da Qazaqstan Respýblıkasynyń atynan ókildik etedi jáne onyń múddelerin qorǵaıdy.
Budan basqa, depýtattar halyqaralyq uıymdarda jumys isteıtin jáne eńbek qyzmetin aıaqtaǵan dıplomatııalyq qyzmet personalynyń eńbek ári áleýmettik quqyqtaryn qorǵaýǵa baǵyttalǵan normalardy ázirledi.
Sondaı-aq depýtattar dıplomatııalyq qyzmetshilerdiń shet tilderin bilgeni úshin tólemderdi ózgertýdi usyndy. Qoldanystaǵy zańnamaǵa sáıkes, dıplomatııalyq qyzmetke kirý kezinde shet tilderdi bilý mindetti, sondyqtan tólemder sırek tilderdi bilgeni úshin ǵana júzege asyrylady. Bul ózgeris te respýblıkalyq bıýdjet qarajatyn únemdeýge baǵyttalǵan.