Syrtqy ister mınıstrliginen 11 fýnktsııa alynyp tastaldy

ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine dıplomatııalyq qyzmet, halyqaralyq sharttar jáne damýǵa resmı kómek máseleleri boıynsha ózgerister men tolyqtyrýlar engizý týraly» Zańy maquldandy.

Zań halyqaralyq qatynastar salasyndaǵy zańnamany jáne dıplomatııalyq qyzmetti jetildirýge baǵyttalǵan.

- Memleket basshysynyń «Memlekettik apparattyń qyzmetin bıýrokratııadan aryltý jónindegi sharalar týraly» Jarlyǵyn iske asyrý maqsatynda ázirlengen zań boıynsha birqatar zańdarǵa ózgeris engizildi. Atap aıtqanda, «Qazaqstan Respýblıkasynyń dıplomatııalyq qyzmeti týraly» zańynan Mınıstrliktiń (SІM) 11 fýnktsııasy, 4 artyq naqtylanǵan norma, «Damýǵa resmı kómek týraly» zańynan 6 fýnktsııasy alynyp tastaldy, «Qazaqstan Respýblıkasynyń halyqaralyq sharttary týraly» zańyna quqyqtyq olqylyqty joıý maqsatynda redaktsııalyq túzetý engizildi. Bular qazirgi ýaqytta Syrtqy ister mınıstrligi týraly erejede jáne basqa da zańǵa táýeldi normatıvtik-quqyqtyq aktilerde qarastyrylǵan, - dedi senator Darhan Qydyráli.

Zańda Syrtqy ister mınıstrligi qyzmetiniń ereksheligin eskere otyryp, dıplomatııalyq qyzmet ardagerlerine buryn halyqaralyq uıymdarda qyzmet atqarǵan azamattardy teńestirý kózdelgen. Sonymen qatar dıplomatııalyq korpýstyń biliktiligin arttyrýǵa jáne ózin-ózi jetildirýge yntalandyratyn dıplomatııalyq qyzmetshilerdiń shet tilderin bilgeni úshin tólemderi ózgertildi.

- Halyqaralyq sharttardy basqarýdyń elektrondyq júıesi engizildi. Sonyń esebinen Qazaqstan Respýblıkasynyń halyqaralyq sharttardy jasasýdy josparlaý alynyp tastaldy. Óz kezeginde bul protsesti ońtaılandyrady. Munymen qosa, Úkimetke Qazaqstan Respýblıkasynan tys jerlerde ornalasqan dıplomatııalyq qyzmet organdaryna bekitilgen memlekettik múlikti ıelikten shyǵarý tártibin bekitý boıynsha quzyret berildi. Osy ózgeris Úkimetke memlekettik múlik jónindegi ýákiletti organmen qatar, Syrtqy ister mınıstrligin osyndaı ıelikten shyǵarýdy júzege asyratyn organ retinde aıqyndaýǵa múmkindik beredi, - dedi depýtat.

Budan buryn habarlanǵandaı, búgin Senattyń jalpy otyrysynda Iranmen saýdany jańa deńgeıge shyǵarýǵa arnalǵan zań maquldandy.