Syrtqy ister mınıstrligi «Talıban» qozǵalysynyń Astanadaǵy forýmǵa shaqyrtylýyna túsinik berdi

ASTANA. KAZINFORM – QR Syrtqy ister mınıstriniń orynbasary Roman Vasılenko Astanadaǵy halyqaralyq forýmǵa qatysýǵa «Talıban» ókilderiniń shaqyrylýyna qatysty túsinik berdi. 

«Birinshiden, saýda-ekonomıkalyq yntymaqtastyqqa basa nazar aýdarylady. Ekinshiden, qazir osy elmen jáne Aýǵanstanda jumys istep jatqan qazirgi basshylyqpen barsha álem qarym-qatynasyn quryp jatyr», - dedi Roman Vasılenko Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, «Talıban» qozǵalysyna qatysty áli de belgili bir suraqtar qaldy.

«Árıne, «Talıban» qozǵalysynyń áıelderdiń úkimet quramynda bolýy, áıelderdiń quqyqtaryn qorǵaýǵa qatysty óz ýádelerin oryndaýyna qatysty másele bar. Ulttyq azshylyq ókilderin bılikke tartýda da suraqtar bar. Degenmen, «Talıban» qozǵalysy negizindegi qazirgi ákimshiliktiń bolýy – ol obektıvti túrde moıyndalǵan fakt. Aýǵanstan - Ortalyq Azııadaǵy óńirlik kórshi. Qazirgi kezde mundaı ózara is-qımyl bizdiń múddelerimizge sáıkes keledi», - dedi mınıstrdiń orynbasary.

Osyǵan deıin Aýǵanstan bıligindegi «Talıban» ókilderi Astanadaǵy halyqaralyq forýmǵa qatysý úshin Qazaqstanǵa shaqyrtylǵany málim boldy.

Budan buryn habarlanǵandaı, Qazaqstan «Talıbandy» elde tyıym salynǵan uıymdar tiziminen shyǵardy.