Qazaqstan – kóppolıarly álemdegi «kópirler salýshy» el – BUU Bas hatshysy
ASTANA. KAZINFORM – Syrtqy ister mınıstri Muhtar Tileýberdi BUU Bas Assambleıasynyń 81-sessııasy aıasynda Birikken Ulttar Uıymynyń Bas hatshysy Antonıý Gýterrıshpen kezdesti, dep habarlaıdy SІM baspasóz qyzmeti.
Mınıstr BUU Bas hatshysyna Qazaqstan Respýblıkasynyń Prezıdenti Qasym-Jomart Toqaevtyń sálemin jetkizip, Memleket basshysynyń atynan kúrdeli halyqaralyq jaǵdaıdaǵy A.Gýterrıshtiń qyzmetine, onyń kópjaqtylyq qaǵıdattary men BUU Jarǵysyna dáıekti beıildiligine, sondaı-aq Qazaqstan Respýblıkasy men BUU arasyndaǵy jan-jaqty yntymaqtastyqty nyǵaıtýǵa qosqan jeke úlesine joǵary baǵa berdi.
Taraptar halyqaralyq kún tártibindegi ózekti máselelerdi jáne BUU Bas Assambleıasynyń 81-sessııasy aıasyndaǵy ózara is-qımyldyń basym baǵyttaryn talqylady.
M.Tileýberdi Bas hatshynyń Uıym qyzmetiniń tıimdiligin arttyrý jónindegi kúsh-jigerin qoldaıtynyn rastady. Osy turǵyda Almatydaǵy Ortalyq Azııa men Aýǵanstan úshin Turaqty damý maqsattary jónindegi BUU Óńirlik ortalyǵynyń qyzmetine kópjaqty yntymaqtastyqtyń óńirlik ólshemindegi negizgi alań retinde erekshe nazar aýdaryldy.
Bas hatshy qalyptasyp kele jatqan kóppolıarly álemdegi Qazaqstannyń róliniń artyp kele jatqanyn erekshe atap ótip, elimizdi «kópirler salýshy» retinde baǵalady jáne Qazaqstannyń negizgi halyqaralyq seriktestermen syndarly qarym-qatynastardy saqtaı alý qabiletine nazar aýdardy.
Kezdesý barysynda Mınıstr BUU Qurmetti qonaqtar kitabyna jazba qaldyryp, Bas hatshynyń kópjaqtylyqty nyǵaıtýǵa qosqan úlesin atap ótti jáne Qazaqstannyń Uıym aıasyndaǵy odan ári ózara is-qımylǵa degen ózgermes beıildiligin bildirdi.
Sondaı-aq Syrtqy ister mınıstri BUU Bas Assambleıasynyń 81-sessııasy aıasynda Kıpr, Grýzııa jáne Rýmynııanyń Syrtqy ister mınıstrlerimen birqatar ekijaqty kezdesý ótkizdi.
Kezdesýler qorytyndysy boıynsha mınıstrler Birikken Ulttar Uıymy jáne basqa da kópjaqty alańdar aıasynda tyǵyz úılestirýdi jalǵastyrýǵa daıyn ekendikterin rastady. Sonymen qatar halyqaralyq jáne óńirlik kún tártibindegi ózekti máseleler jóninde pikir almasty.
Aıta keteıik, buǵan deıin Qazaqstan men Benın ózara vızalyq talaptardan bosatý týraly kelisimge qol qoıǵanyn habarladyq.
Sondaı-aq Túrki memleketteri uıymynyń syrtqy ister mınıstrleri AQSh-ta bas qosty.
