Syrtqy ister mınıstri BUU Adam quqyqtary jónindegi keńesine qatysty
JENEVA.KAZINFORM – Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý bastaǵan qazaqstandyq delegatsııa BUU Adam quqyqtary jónindegi keńesiniń 55-shi sessııasynyń Joǵary deńgeıdegi segmentine jáne BUU jahandyq alańynyń basqa da is-sharalaryna qatysý úshin Jenevaǵa keldi. Otyrysqa 100-den astam memleketterdiń joǵary ókilderi, BUU Bas hatshysy Antonıý Gýterrısh jáne Adam quqyqtary jónindegi joǵarǵy komıssary Folker Tıýrk qatysty.
QR SІM basshysy óz sózinde halyqaralyq qoǵamdastyqqa Qazaqstannyń osy baǵyttaǵy ulttyq quqyq qorǵaý júıesin jetildirý salasyndaǵy qol jetkizgen nátıjeleri jáne aldaǵy basymdyqtar týraly habardar etti. Ásirese QR Prezıdenti Qasym-Jomart Toqaevtyń júrgizip jatqan reformalarynyń tórt paketin iske asyrý, Konstıtýtsııalyq Sotty qaıta qurý, sondaı-aq Adam quqyqtary jónindegi ýákili ınstıtýtyn kúsheıtýdiń nátıjeleri atalyp ótti.
Osy oraıda M. Nurtileý halyqaralyq qoǵamdastyqqa: «Qazaqstandaǵy demokratııalyq ózgerister qaıtymsyz» degen bas messedjin jarııalady.
Qazaqstan syrtqy saıası vedomstvosynyń basshysy geosaıası teke-tirester men óńirlik qaqtyǵystardyń, sondaı-aq álemde ósip kele jatqan ekonomıkalyq belgisizdiktiń kúsheıýine alańdaýshylyq bildirdi. Ol eshbir eldiń mundaı daǵdarystardy jalǵyz ózi jeńe almaıtynyn tilge tıek etip, osy baǵytta kópjaqty seriktestikti nyǵaıtýǵa shaqyrdy.
Mınıstr Qazaqstan ulttar arasyndaǵy dıalog pen ózara túsinistikke, sondaı-aq jahandyq quqyq qorǵaý júıesin nyǵaıtýǵa óz úlesin qosýdy jalǵastyratynyn atap ótti.
M. Nurtileý halyqaralyq qoǵamdastyqty qarýsyzdaný, tsıfrlandyrý jáne genderlik teńdik máselelerinde adam quqyqtaryn beıbitshilik qurý jónindegi kúsh-jigerdiń negizine qoıýǵa shaqyrdy.
Anyqtama: Birikken Ulttar Uıymynyń Adam quqyqtary jónindegi keńesi (BUU AQJK – UNHRC) Bas Assambleıanyń 2006 jylǵy 15 naýryzdaǵy 60/251 qararyna sáıkes quryldy jáne búkil álem boıynsha adam quqyqtaryn jalpyǵa birdeı qurmetteýge jáne qorǵaýǵa, adam quqyqtarynyń buzylýyna baılanysty jaǵdaılardy qaraýǵa, sondaı-aq tıisti usynystar daıyndaýǵa jaýapty BUU júıesiniń úkimetaralyq organy. BUU AQJK onyń aldynda jumys istegen BUU-nyń Adam quqyqtary jónindegi komıssııasynyń ornyna quryldy. Keńes quramyna 47 múshe memleket kiredi, olar tikeleı jasyryn daýys berý arqyly kópshilik daýyspen úsh jylǵa saılanady.
