Syrtqy ister mınıstri Armenııanyń UQShU-dan shyǵý sheshimi týraly aqparatty joqqa shyǵardy

ASTANA. KAZINFORM – Armenııa syrtqy ister mınıstri Ararat Mırzoıan eldiń UQShU-dan shyǵý sheshimi týraly aqparatty joqqa shyǵardy, dep habarlaıdy armeniatoday.

«Armenııa premer-mınıstri Nıkol Pashınıan UQShU-dan qashan shyǵý kerektigin sheshemiz dedi. Tıisinshe, premer-mınıstr Armenııanyń UQShU-dan shyǵatyny týraly habarlady degen qorytyndyǵa kelgender qatelesedi», - dep málimdedi Mırzoıan parlamentte.

Onyń atap ótýinshe, parlament otyrysy jazylyp jatyr jáne Pashınıannyń sózderin ońaı tekserýge bolady. 

Pashınıan 12 maýsymda parlamentte ótken úkimet otyrysynda Taýly Qarabaqtaǵy 44 kúndik soǵystaǵy jeńilis pen qazirgi jaǵdaıǵa jaýaptylar týraly suraqqa jaýap bere otyryp, «kópirshik alıans» týdyrǵandardyń kinásin atap ótti, bul rette olardyń kim ekenin ataǵan joq. 

Armenııa nelikten UQShU-dan shyqpaıdy degen suraqqa premer-mınıstr «qashan shyǵý kerektigin bılik sheshedi» dep jaýap berdi.

«Kópirshik alıans» túrin qurǵandar kináli, olardyń músheleri sharttyq mindettemelerin oryndamaı, Ázerbaıjanmen bizge qarsy soǵysty josparlap otyr. Olar kináli... Bizdi osymen qorqytyp otyrsyńdar ma? Biz durys jasap otyrmyz. Biz qashan shyǵatynymyzdy sheshemiz», - dep eskertti Pashınıan parlamenttik oppozııatsııaǵa sóılegen sózinde.