Syrtqy saýdany retteý jáne ishki naryqty qorǵaý máselesi boıynsha birneshe sheshim qabyldandy
ASTANA. KAZINFORM – Úkimette vıtse-premer – Ulttyq ekonomıka mınıstri Serik Jumanǵarınniń tóraǵalyǵymen ótken Syrtqy saýda jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń (VAK) otyrysynda ishki naryqty qorǵaýǵa jáne ornyqty ekonomıkalyq ósimdi qamtamasyz etýge arnalǵan birneshe sheshim qabyldandy.
Týrızm jáne sport mınıstrliginiń bastamasymen VAK Qazaqstan aýmaǵyna oıyn avtomattaryn ákelýge ruqsat berý tártibin alty aı merzimge maquldady. Olardy tek oıyn bıznesine memlekettik lıtsenzııasy bar uıymdar ǵana ákele alady. Lıtsenzııa berý tetigi Zańsyz oıyn bıznesi men lýdomanııaǵa qarsy is-qımyl jónindegi keshendi jospardy júzege asyrý sheńberinde engiziledi.
Sondaı-aq VAK-ta 2023 jylǵy 4 aqpannan beri qoldanylyp kele jatqan kúnbaǵys tuqymyn eksporttaýǵa salynatyn kedendik bajdy (EKB) odan ári saqtaýdyń qanshalyqty maqsatqa saı ekendigi qaraldy. Onyń mólsheri 20%, biraq bir tonnasyna 100 eýrodan kem emes soma. Baj qoldanylǵan ýaqyt ishinde bıýdjetke 24,1 mlrd teńge túsken. Ol el bıýdjetine quıylyp, keıin aýyl sharýashylyǵy taýaryn óndirýshilerge sýbsıdııa retinde beriletini belgili. Sonymen qatar baj qoldanylǵan úsh jyl ishinde elimizde kúnbaǵys maıyn óndirý 2,5 ese, eksport 4,8 ese ósken. Osylaısha, Qazaqstan alǵash ret kúnbaǵys maıyn eksporttaýshylardyń tańdaýly ondyǵyna enip, 8-oryndy ıelendi. EKB-ny engizý nátıjesinde ishki naryqta kúnbaǵys maıynyń baǵasy turaqtandy: búginde onyń 1 lıtriniń ortasha baǵasy 843 teńge turady. Al baj alymy engizilgen 2023 jyldyń qańtarynda 900 teńgeden joǵary bolǵan edi.
Áıtse de, kúnbaǵys tuqymyn óndirýshiler egin jınaý naýqany kezinde kúnbaǵys tuqymyn satyp alý baǵasy olar kútken deńgeıden tómen bolyp turǵanyn aıtyp otyr. Talqylaý qorytyndysynda Básekelestikti qorǵaý jáne damytý agenttigine kúnbaǵys maıynyń kóterme naryǵyna taldaý júrgizip, maı óńdeý kásiporyndarynyń satyp alý baǵasyn zerdeleý tapsyryldy. Keıin bul másele komıssııanyń kezekti otyrysynda qaıta qaralatyn bolady.
Jıynda VAK sheshimimen Qazaqstan aýmaǵynan suıytylǵan munaı gazyn avtomobıl jáne temir jol kóligimen áketýge salynǵan tyıym alty aıǵa uzartyldy. Bul shara suıytylǵan gazdy otyn retinde paıdalanatyn avtomobıl qatarynyń ósýin jáne onyń áleýmettik mańyzdylyǵyn eskere otyryp, ishki suranysty qamtamasyz etýge baǵyttalǵan. Sondaı-aq EAEO elderine tasýdy qosa alǵanda, iri qaranyń buqashasyn áketýge salynǵan tyıym da alty aıǵa uzartyldy jáne usaq múıizdi maldyń 120 bas qoshqaryn áketýge beriletin kvotanyń kúshi saqtaldy.
Aıta keteıik, QR Premer-mınıstriniń orynbasary – Ulttyq ekonomıka mınıstri Serik Jumanǵarın Qazaqstandaǵy Amerıkalyq saýda palatasynyń atqarýshy dırektory Djeff Erlıhpen kezdesti.