Syrt alańda «Qyzyljar» komandasyn jeńgen «Ordabasy» chempıondyqqa jaqyndaı tústi

ASTANA. KAZINFORM – Búgin fýtboldan Qazaqstan Premer-lıgasynyń HHІІ týrynda Semeıdiń «Elimaı» komandasy syrt alańda taldyqorǵandyq «Jetisýdan» jeńilip qaldy. Al «Ordabasy» Petropavlda jergilikti «Qyzyljar» komandasyn mınımaldy eseppen jeńdi. 

Júldeli orynnan dámeli semeılik klýb qazirgi ýaqytta týrnırlik kestede úzdik úshtikti túıindep tur. Áli de bas júldege talasatyn múmkindigi bar. Degenmen búgin olar Taldyqorǵannyń «Jetisýynan» 0:2 esebimen jeńilip qaldy. Kezdesýdiń favorıti sanalǵan ujym túzde upaı joǵaltyp, jaǵdaıyn birshama qıyndatyp aldy. 

Chempıondyqtan basty úmitker Shymkenttiń «Ordabasy» klýby ekinshi jyl qatarynan jeńis tuǵyrynan kórinýge jaqyn. Petropavlda jergilikti «Qyzyljar» klýbymen kezdesken olar 1:0 esebimen jeńiske jetti. Nátıjesinde týrnır kestesinde 39 upaımen qarsylastarynan uzaı tústi.

Endi atalǵan týrdaǵy qalǵan úsh oıyn erteń ótedi. 16:00-de «Aqtóbe» men «Qaırat» (Almaty), «Atyraý» men «Turan» (Túrkistan), «Jeńis» (Astana) pen «Tobyl» (Qostanaı) jasyl alańǵa shyǵyp, kim myqtyny anyqtaıdy. 

Al, atalǵan týrdaǵy «Astana» men «Shahter» (Qaraǵandy) kezdesýi 16 qazanǵa shegerildi.