Syrshyl aqyn Tumanbaı Moldaǵalıevtiń týǵanyna - 90 jyl

ASTANA. KAZINFORM -  Búgin Qazaqstan Halyq jazýshysy, Qazaq KSR Memlekettik syılyǵynyń laýreaty Tumanbaı Moldaǵalıevtiń týǵanyna 90 jyl toldy.

Tumanbaı Moldaǵalıev 1935 jyly 20 naýryzda Almaty oblysy, Eńbekshiqazaq aýdany, «Jarsý» sovhozynda týǵan. 2011 jyly 10 qazanda dúnıeden ozdy.

Ol jyly Qazaq memlekettik ýnıversıtetiniń fılologııa fakýltetin bitirgen. Óziniń shyǵarmashylyq eńbek jolyn «Lenınshil jas» gazeti men «Pıoner» jýrnalynan bastady. 1959-1970 jyldar aralyǵynda «Pıoner» jýrnalynda qyzmet atqardy. 1970-1973 jyldar aralyǵynda «Baldyrǵan» jýrnalynyń jaýapty hatshysy boldy. 1973 jyldan «Jazýshy» baspasy janyndaǵy Balalar jáne jastar ádebıetiniń bas redaktsııasy men «Jalyn» jýrnalynyń bas redaktory bolyp qyzmet istedi.

Alǵashqy óleńder jınaǵy «Stýdent dápteri» 1957 jyly jaryq kórdi. T. Moldaǵalıev názik syrly, oıly da otty jyrlarmen tanyldy. «Kámıla» (1960), «Kóktem tańy» (1961) , «Alataý qyzy» (1963), «Ferıýza týraly jyr» (1964), «Zýlaıdy kúnder» (1965), «Júregim meniń saparda» (1966), t. b. jınaqtary shyqty. 1967 jyly jaryq kórgen «Jańa dápter» atty kitaby úshin 1968 jyly Qazaqstan Komsomoly syılyǵynyń laýreaty atandy. «Eskertkish» (1969), «Shaqyrady jaz meni» (1970), «Júrek oıaý qashanda» (1972) atty kitaptary da oqýshylardyń iltıpatyna bólendi. Onyń «Qosh, kóktem» atty tańdamaly óleńder kitaby (1971), «Hattar» atty poemalar jınaǵy (1974) jaryq kórdi. T.Moldaǵalıevtiń orys tilinde «ıA - syn Semırechıa» (1962), «Pervaıa vstrecha» (1968), «Novaıa tetrad» (1969) atty óleń jınaqtary shyqqan.

Tumanbaı Moldaǵalıevtyń jalpy 500 óleńine ánder jazylǵan. Onyń «Qustar qaıtyp barady» (mýzykasy N. Tilendıevtiki), «Baqyt qushaǵynda», «Ánim sen ediń» (mýzykasy Sh.Qaldaıaqovtiki), «Ertis valsi» (mýzykasy B. Jamaqaevtiki), «Shaqyrady kóktem» (mýz. Á.Beıseýovtiki) atty ánge jazylǵan óleńderi halyq arasyna keń taraǵan. Ol Baıron, M. Lermontov, T. Shevchenko, O.Týmanıan, S.Kapýtıkıan, Ǵ. Ǵulam, R. Ǵamzatov jáne basqa da aqyndardyń shyǵarmalaryn qazaq tiline aýdardy.

Aqynnyń 1990 jyly 13 tomdyq shyǵarmalar jınaǵy, 2004 jyly 14 tomdyq shyǵarmalar jınaǵy jaryq kórdi.

1992 jyly Fızýlı atyndaǵy Halyqaralyq túrki dúnıesi aqyndary syılyǵy tapsyryldy.

Astanada aqyn Tumanbaı Moldaǵalıevtiń shyǵarmashylyǵyna arnalǵan ádebı kesh ótken bolatyn.