Syrmaqtan dronǵa deıin: Aqtóbeniń kreatorlary Astanada tyń jobalaryn tanystyrdy
AQTÓBE. KAZINFORM — Elordada Creative Aimaq respýblıkalyq jobasy aıasynda Aqtobe Creative Days mádenı-kreatıvti kórme-jármeńkesi ashyldy. Eki kúnge josparlanǵan sharada Aqtóbe oblysynyń 100-den astam kreatory 30-ǵa jýyq baǵyt boıynsha avtorlyq ónimderi men shyǵarmashylyq jobalaryn tanystyrady.
Kórme Kreatıvti ındýstrııalardy damytý qorynyń Qazaq Creative Hub keńistiginde ótip jatyr. Munda qolóner sheberleri, dızaınerler, sýretshiler, IT mamandary men mádenıet mekemeleriniń shyǵarmashylyq ujymdary bas qosty.
Kelýshilerge zergerlik áshekeıler, teriden, aǵashtan, súıek pen júnnen jasalǵan buıymdar, kıiz týyndylary, syrmaq, basqur jáne ulttyq aksessýarlar usynylǵan. Sheberler óz jumystaryn kórsetip, tájirıbelik sabaqtar ótkizedi.
Kórme-jármeńkede ulttyq naqysh pen zamanaýı sándi ushtastyrǵan jeti dızaınerdiń toptamasy da tanystyryldy. Olardyń qatarynda SAULEMAI COUTURE, Trumova Collection, SYRMAK, ULPAN SAN UI, MARKA sán úıleri men Azamat SAIN brendi bar. Máselen, SYRMAK dástúrli syrmaq úlgisin zamanaýı syrt kıimmen úılestirse, basqa brendter ulttyq naqyshty kúndelikti kıimge engizgen.
Kórmege áskerı ınstıtýt kýrsanttarynyń tehnologııalyq jobalary da qoıyldy. T. Bıgeldınov atyndaǵy Áýe qorǵanysy kúshteriniń áskerı ınstıtýtynyń kýrsanty Sultanbek Álimjan birneshe ushqyshsyz ushý apparatyn tanystyrdy.
— «Kóbelek» qatynaý qıyn eldi mekenderge dári-dármek pen hat jetkizýge arnalǵan. «Jalyn» órt oshaqtaryn sóndirýge kómektesedi. «Aspan» aýa raıyn zerttep, meteorologııalyq barlaý júrgizedi. Al «Operator» qıraǵan nemese tútin basqan ǵımarattarda izdestirý jumystaryn atqarýǵa arnalǵan. Barlyq apparat synaqtan ótti. Olardy 3D-prınter arqyly ózimiz qurastyramyz, — dedi ol.
Ulttyq qundylyqtardy balalarǵa oıyn arqyly úıretýge arnalǵan «Hanshaıym» jobasy da jurt nazaryna usynyldy. Joba avtory Ásııa Mýsınova oıynǵa qazaqtyń 100 salt-dástúri engizilgenin aıtty.
— Oıyn ulttyq kıim, taǵam, salt-dástúr men qolónerdi qamtıdy. Maqsatymyz — balalarǵa oıyn arqyly bilim berip, qarjylyq saýatyn arttyrý jáne ulttyq qundylyqtardy boıyna sińirý. Qazir oıyn qazaq jáne orys tilderinde bar. Aldaǵy ýaqytta aǵylshyn tilindegi nusqasyn ázirlep, ulttyq dástúrimizdi sheteldikterge de tanytqymyz keledi. Sondaı-aq ul balalarǵa arnalǵan «Jigit sultany» oıynyn shyǵarýdy josparlap otyrmyz, — dedi Ásııa Mýsınova.
Kórmeden ánshi Dımash Qudaıbergenniń shyǵarmashylyǵyna arnalǵan ekspozıtsııany, Aqtóbe aqyn-jazýshylarynyń kitaptary qoıylǵan Book Market alańyn da kórýge bolady. Sonymen qatar jas jazýshy Álıhan Jaqsylyqtyń óńirge arnalǵan anımatsııalyq fılmi jáne Aqtóbe oblystyq «Alaqaı» qýyrshaq teatrynyń erekshe balalarǵa arnalǵan «Jyl mezgilderi» ınklıýzıvti qoıylymy usynylǵan. Baǵdarlamada mýzykalyq kontsertter men shyǵarmashylyq kezdesýler de bar.
Aqtóbe oblysynda 3 myńnan astam mádenıet qyzmetkeri eńbek etedi. Aqtobe Creative Days jergilikti brendter men avtorlyq ónimderdi keńinen tanystyryp, dástúrli mádenıetti zamanaýı shyǵarmashylyqpen ushtastyrýǵa múmkindik beredi.
Aıta keteıik, Creative Aimaq respýblıkalyq jobasy QR Mádenıet jáne aqparat mınıstrliginiń qoldaýymen «Kreatıvti ındýstrııalardy damytý qory» tarapynan júzege asyrylady.
Joba óńirlerdiń shyǵarmashylyq áleýetin tanytýǵa jáne otandyq brendterdi qoldaýǵa baǵyttalǵan.
