Sırııanyń Homs qalasynda narazy top ortalyq alańdy basyp aldy
ASTANA. 19 sáýir. QazAqparat - Úkimetke qarsy sherýshiler Sırııadaǵy aýqymy jaǵynan úshinshi bolyp tabylatyn Homs qalasynyń ortalyq alańyn basyp aldy, dep habarlaıdy VVS telekompanııasy.
Manıfestshiler, tótenshe jaǵdaıdyń kúshin toqtatý jáne saıası tutqyndardy túrmeden bosatý týraly ózderiniń talaptary oryndalmaıynsha, alańnan ketpeıtinderin málim etýde.
Eldegi buqaralyq tolqýdyń qarýly tóńkeriske ulasyp otyrǵanyn málim etken Sırııa Іshki ister mınıstrliginiń ókilderi, tártipti kúshpen ornatý nıetteri týraly eskertti.
Jeksenbi, 17 sáýirde Homs qalasynda sherýshiler men polıtsııanyń arasynda qaqtyǵys oryn aldy, bul oqıǵaǵa jergilikti rý basylardyń biriniń qamaýda otyryp qaıtys bolýy sebep boldy. Al qarýly qaqtyǵys barysynda segiz adam qaza boldy.
Quqyq qorǵaý uıymdarynyń derekteri boıynsha, ótken aıda Sırııada osyndaı qaqtyǵystarda 200-ge jýyq adam qaza tapqan. Eldi sońǵy 11 jyl boıy basqaryp kele jatqan jáne prezıdenttik taqqa ákesinen keıin otyrǵan Sırııa Prezıdenti Bashar Asad eldegi 48 jylǵa sozylyp otyrǵan tótenshe jaǵdaı rejımi jaqyn kúnderi alyp tastalynatynyn jarııa etti.
