Sırııanyń jańa kóshbasshysy elden áskerdi shyǵarý úshin Izraılge qysym jasaýdy talap etedi
ASTANA. KAZINFORM - Ash-Sharaa Izraıldiń is-áreketin búkil aımaqtaǵy qaýipsizdik pen beıbitshilikke tikeleı qaýip dep atady, dep habarlaıdy Kazinform tilshisi.
Sırııa Prezıdentiniń ýaqytsha mindetin atqarýshy Ahmed ash-Sharaa halyqaralyq qaýymdastyqty Izraıldiń áskerlerin Sırııanyń ońtústiginen dereý shyǵarý úshin qysym jasaýǵa shaqyrdy.
Qazir Izraıl armııasy býferlik aımaqty ustap, odan tys jerlerge basyp kirýde. Izraıl buny Sırııanyń jańa basshylyǵynan qorǵaýǵa baǵyttalǵan áreket dep sanaıdy.
— Biz halyqaralyq qaýymdastyqty Sırııanyń quqyqtaryn qoldaý jáne Izraılge Sırııanyń ońtústiginen áskerlerdi dereý shyǵarýǵa qysym jasaý arqyly óziniń quqyqtyq jáne moraldyq mindettemelerin oryndaýǵa shaqyramyz, - dedi ash-Sharaa Kaırdegi Arab lıgasynyń sammıtinde.
Ash-Sharaa Sırııa bıligi aýysqannan keıingi Arab Lıgasynyń birinshi sammıtine qatysty.
Ol «dushpandyq ekspansııa Sırııanyń egemendigin buzý ǵana emes, sonymen qatar búkil aımaqtaǵy qaýipsizdik pen beıbitshilikke tikeleı qater» dep qosty.
Sammıt aıasynda ash-Sharaa alǵash ret Mysyr prezıdenti Ábdel Fattah ál-Sısımen kezdesti. Mysyr prezıdenttik keńsesiniń málimdemesinde bul kezdesýde ál-Sısı ash-Sharaany eshbir tarapty syrtqa shyǵarmaı, barlyq sırııalyqtardy qamtıtyn ınklıýzıvti saıası protsesti bastaýǵa shaqyrǵany aıtyldy.
Sırııa prezıdenti Ahmed ash-Sharaa, buryn Ábý Mohammad ál-Djýlanı degen atpen belgili, 2024 jyly jeltoqsanda Damaskige jasalǵan aýqymdy shabýyl kezinde Sırııanyń burynǵy prezıdenti Bashar Asadtyń bılikten ketýine ákelgen «Haıat Tahrır ash-Sham» (HTSh, Qazaqstanda tyıym salynǵan uıym) uıymynyń jetekshisi.
Kórshi eldegi bılik aýysqannan keıin Izraıl 1974 jyldan beri Golan jotasyndaǵy Izraıl men Sırııa kúshterin bólip turǵan BUU patrýldik býferlik aımaqqa áskerlerin ornalastyrdy.
Qurlyq shabýyldarynan bólek, Izraıl kúshteri sońǵy kúnderi Sırııanyń áskerı nysandaryna birneshe ret áýeden shabýyl jasady.
Izraıl soltústik shekaralarynyń qaýipsizdigine alańdaıdy. Qańtar aıynda Izraılde tipti Sırııa boıynsha halyqaralyq konferentsııaǵa shaqyrý týraly usynystar da boldy, onyń barysynda eldi ártúrli ákimshilik birlikterge bólý máselesi qaralatyn boldy.
Ótken aptada Sırııanyń saıası bolashaǵyn anyqtaýǵa kómektesý úshin Damaskide Ulttyq dıalog konferentsııasy ótti. Onda ash-Sharaa eldiń aýmaqtyq tutastyǵyn qorǵaýǵa shaqyrdy.
Osyǵan deıin EO-nyńSırııadaǵy jaǵdaıdy turaqtandyrý úshin sanktsııalardy toqtatatyny týraly jazdyq.