Sırııanyń ýaqytsha prezıdenti Saýd Arabııasyna bardy
ASTANA. KAZINFORM – Bul – Ahmed ash-Sharaanyń Sırııanyń ýaqytsha prezıdenti retindegi alǵashqy sheteldik sapary. Jeksenbide ol Er-Rııadta Saýd Arabııasynyń murager hanzadasy Muhammed ben Salmanmen kezdesti. Kazinform agenttiginiń menshikti tilshisi atalǵan kezdesý jańa Sırııanyń bolashaǵyna qalaı áser etetinin baǵamdap kórdi.
Jeksenbi kúni Sırııa prezıdenti Er-Rııadtaǵy Korol Halıd áýejaıyna kelip, ony el astanasy gýbernatorynyń orynbasary hanzada Muhammed bın Abdýlrahman bın Abdýlazız qarsy aldy.
Aıta keteıik, ótken aptada «Haıat Tahrır ash-Sham» (HTSh Qazaqstanda tyıym salynǵan uıym) tobynyń basshysy, buryn Ábý Muhammed ál-Djýlanı degen atpen belgili Ahmed ash-Sharaa Sırııanyń prezıdenti bolyp jarııalanǵan edi. Sapar aıasynda Saýd Arabııasynyń taq murageri Muhammed bın Salmanmen kezdesý ótti.
Er-Rııadtaǵy kelissózge Sırııa prezıdentimen birge Sırııanyń Syrtqy ister mınıstri Asad ál-Shaıbanı de bardy. Kezdesýden keıin ash-Sharaa bın Salmanmen júzdesý Saýd Arabııasynyń «Sırııany bolashaǵyn qurýda qoldaýǵa shyn nıeti baryn» kórsetkenin aıtty.
Ash-Sharaa jazbasha málimdemesinde murager hanzadamen gýmanıtarlyq jáne ekonomıkalyq yntymaqtastyqty, sonymen qatar «energetıka, tehnologııa, bilim jáne densaýlyq salalaryndaǵy aýqymdy bolashaq josparlaryn» talqylaǵanyn aıtty.
- Búgin biz uzaq kezdesý ótkizdik. Basqosý barysynda Sırııanyń bolashaǵyn qurýǵa qoldaý kórsetýge degen shynaıy nıetti, sondaı-aq Sırııa halqynyń erik-jigerin, onyń aýmaqtarynyń birligi men tutastyǵyn qoldaýǵa degen umtylysty sezindik jáne estidik, - dedi Sırııa kóshbasshysy.
Saýd Arabııasy aqparat agenttiginiń habarlaýynsha, prezıdentter ekijaqty qarym-qatynastardy jaqsartý jáne aımaqtyq damý máselelerin talqylady.
Buqaralyq aqparat quraldarynyń habarlaýynsha, Ash-Sharaa dúısenbi kúni musylmandardyń qasıetti qalasy Mekkege barý úshin koroldikte qalady. Ol Saýd Arabııasynda dúnıege kelgen jáne balalyq shaǵynyń bir bóligin sonda ótkizgen.
Ash-Sharaa 8 jeltoqsanda eldegi jappaı shabýyldan keıin prezıdent Bashar Asadty bılikten taıdyrǵan sırııalyq oppozıtsııany basqardy. Sodan beri Sırııanyń jańa ákimshiligi aımaqtyq jáne halyqaralyq zańdylyqqa qol jetkizip, Batystyń Sırııaǵa qarsy sanktsııalarynyń joıylýyna qol jetkizýge tyrysty.