Sırııanyń Sýveıda provıntsııasyna 30 kólik gýmanıtarlyq kómek jetkizildi
ASTANA. KAZINFORM — Sırııalyq Qyzyl Jarty Aı uıymy eldiń ońtústiginde ornalasqan Sýveıda provıntsııasyna gýmanıtarlyq qajettilikterdi óteý maqsatynda 30 júk kóligi jiberilgenin habarlady, dep jazady Anadoly.

Provıntsııa ákimshiliginiń Telegram paraqshasynda jarııalanǵan málimdemege sáıkes, Qyzyl Jarty Aı jibergen gýmanıtarlyq kómektiń ekinshi kerýeni Sýveıda shekarasyna jetken.
Gýmanıtarlyq kómek quramynda jedel járdem kólikteri, dári-dármekter, turmystyq taýarlar jáne janarmaı tasıtyn avtotsısternalar bar. Bul kómek — sońǵy ýaqytta Sýveıdada bolǵan oqıǵalarǵa baılanysty negizgi qajettilikterge qol jetkize almaı otyrǵan beıbit turǵyndarǵa arnalǵan.
Sýveıdadaǵy qaqtyǵystar
13 shildede Sýveıda provıntsııasynda arab-bádáýıleri (kóshpeli arab halqy) men keıbir drýz toptary arasynda qarýly qaqtyǵystar boldy. Jaǵdaıǵa aralasý úshin kelgen Sırııa qaýipsizdik kúshteri qarýly shabýylǵa tap boldy.
Qaqtyǵystar ýaqytsha bitim arqyly toqtatylǵanymen, Hıkmat ál-Hadjrıge baǵynyshty drýz jasaqtary bul kelisimdi buzdy.
16 shildede Izraıl armııasy Sırııadaǵy prezıdent saraıy, Bas shtab jáne Qorǵanys mınıstrligine soqqy jasady.
Sırııa armııasy Sýveıdadan shegingennen keıin ál-Hadjrı toby bádáýı otbasylaryn qýyp shyǵara bastady jáne olarǵa qarsy kúsh qoldandy. Buǵan jaýap retinde myńdaǵan bádáýı jáne taıpa jaýyngerleri arab-bádáýılerdi qoldaý úshin jınaldy.
19 shildede Sırııa úkimeti Sýveıdaǵa qaýipsizdik kúshterin qaıta ornalastyryp, qaladaǵy bádáýıler men taıpalyq qarýly toptardy yǵystyrdy.
Aıta keteıik, 13 shildede bastalǵan qaqtyǵystardyń saldarynan júzdegen beıbit turǵyn men qarýly adam qaza tapqany habarlandy.
Buǵan deıin Sırııa bıligi Es-Sýveıdadan áskerin shyǵara bastaǵanyn jazǵan edik.