Sırııanyń prezıdenti Ahmed ash-Sharaa alǵash ret Londonǵa resmı saparmen bardy
ASTANA.KAZINFORM — Sırııanyń ýaqytsha prezıdenti Ahmed ash-Sharaa Londonǵa alǵash ret resmı saparmen baryp, Ulybrıtanııa premer-mınıstri Kır Starmermen Daýnıng-strıtte kelissózder ótkizdi. Bul onyń 2024 jyly eldiń kóp jyldyq basshysy Bashar ál-Asad bılikten ketkennen keıingi alǵashqy sapary boldy. Bul týraly Euronews.com jazdy.
Kezdesý barysynda taraptar Iranmen baılanysty soǵys máselesin talqylady. Daýnıng-strıt ókiliniń aıtýynsha, eki kóshbasshy Ormýz buǵazynyń jumysyn qaıta jandandyrý úshin tıimdi jospar ázirleý qajettigin atap ótti. Buǵazdyń uzaq ýaqyt jabyq bolýy aıtarlyqtaı ekonomıkalyq saldarǵa ákelgen. Sondaı-aq olar teńiz qatynasynyń erkindigin qalpyna keltirý úshin basqa eldermen birlesip jumys isteýge kelisti.
Ash-Sharaa bılikke kelgennen keıin el ishinde alevıtterge, drýzdarǵa, kúrdterge jáne hrıstıandarǵa qarsy shabýyldar jıilegen. Dinı toptar arasyndaǵy qaqtyǵystar zorlyq-zombylyqpen qatar júrip jatyr, al Islam memleketi uıymy áli de belsendi kúıinde qalyp otyr.
Kır Starmer Sırııa úkimetiniń atalǵan uıymǵa qarsy áreketterin quptap, terrorızmmen kúrestegi ilgerileýdi atap ótti. Sonymen qatar ol zańsyz mıgranttardy qaıtarý, shekara qaýipsizdigin kúsheıtý jáne adam saýdasymen aınalysatyn jelilerge qarsy kúres boıynsha Damaskpen tyǵyz yntymaqtastyq ornatýǵa shaqyrdy.
Resmı derekterge sáıkes, 2011–2021 jyldary azamattyq soǵys saldarynan 30 myńnan astam sırııalyq Ulybrıtanııadan baspana alǵan.
Ash-Sharaanyń bul sapary Londonnyń 2025 jyldyń shildesinde Sırııamen dıplomatııalyq qatynastardy qalpyna keltirý týraly sheshiminen keıin júzege asty. Buǵan deıin Ulybrıtanııanyń syrtqy ister mınıstri Devıd Lemmı Damaskke baryp, sońǵy 14 jyldaǵy alǵashqy resmı sapardy jasaǵan edi.
Sol kezde Ulybrıtanııa bıligi Sırııamen baılanys ornatý saıası reformalardy qoldaýǵa, ekonomıkany qalpyna keltirýge, zańsyz mıgratsııany azaıtýǵa jáne hımııalyq qarý máselelerin sheshýge baǵyttalǵanyn málimdegen.
Apta basynda Ash-Sharaa Berlınde Germanııa kantsleri Frıdrıh Mertsmen de kezdesken. Germanııa — Eýropadaǵy eń iri ekonomıka jáne EO aýmaǵyndaǵy eń úlken sırııalyq dıaspora turatyn el (1 mıllıonnan astam adam).
Frıdrıh Merts mıgratsııalyq saıasatty qatańdatýdy basty basymdyqtarynyń biri retinde atap ótip, Germanııada turatyn sırııalyqtardyń 80%-y aldaǵy úsh jyl ishinde óz eline oralýy tıis degen kelisimge kelgenin aıtty.
43 jastaǵy Ash-Sharaa Batys elderimen qarym-qatynasty jaqsartyp, AQSh, Frantsııa jáne Reseıge saparlar jasaǵan. Sonyń nátıjesinde Sırııaǵa salynǵan kóptegen halyqaralyq sanktsııalar alynyp, eldi 14 jylǵa sozylǵan azamattyq soǵystan keıin qalpyna keltirýge múmkindik týǵan.
Sapar barysynda Ash-Sharaa Korol Charlz IIIpen Býkıngem saraıynda da kezdesken. Alaıda olardyń qandaı máselelerdi talqylaǵany jarııalanǵan joq.
Buǵan deıin Sırııa prezıdenti Ahmed ash-Sharaa resmı saparmen AQSh-qa barǵan bolatyn.