Sırııanyń qıraǵan bóligin kim qalpyna keltiredi
ASTANA. KAZINFORM - Túrik qurylys kompanııalarynyń, sonyń ishinde tsement jáne bolat kompanııalarynyń aktsııalary qor naryqtarynda kúshti ósim kórsetti. Sarapshylar bul kásiporyndardyń Bashar Asad rejımi qulaǵannan keıin Sırııany qalpyna keltirýde sheshýshi ról atqarady dep túsindiredi.
Sońǵy aptada iri ınvestorlardyń nazary Túrkııanyń qurylys sektoryna aýdy. Sebebi eldegi tsement, metall konstrýktsııalary jáne basqa da qurylys ónimderin óndirýmen aınalysatyn kompanııalar perspektıvaly ınvestıtsııalyq maqsatqa aınaldy. Bul qyzyǵýshylyqtyń bir sebebi aldaǵy Sırııadaǵy aýqymdy qalpyna keltirý jumystary.
Túrik qurylys sektory joǵary damý deńgeıimen jáne halyqaralyq jobalarǵa belsendi qatysýymen tanymal. Sırııaǵa geografııalyq jaqyndyǵy, damyǵan kólik ınfraqurylymy jáne qaıta qurý jobalaryndaǵy tájirıbesi Túrkııaǵa artyqshylyq beredi. Sońǵy jyldary túrik kompanııalary Irak, Lıvııa, Aýǵanstan jáne Ýkraına sııaqty elderde belsendilik tanytyp, qıyndyqtarǵa tótep berý qabiletin kórsetti.
Túrkııanyń qurylys naryǵyndaǵy eń iri oıynshylar
«Çimsa Çimento Sanayi ve Ticaret A.Ş.» Túrkııadaǵy jetekshi tsement óndirýshilerdiń biri. Kompanııa óz ónimderin ondaǵan elderge eksporttaıdy jáne iri ınfraqurylymdyq jobalarǵa suranysqa ıe tsement óndirýge mamandanǵan. «Çimsa» Irakta jáne Taıaý Shyǵys aımaǵyndaǵy basqa elderde qalpyna keltirý jumystaryna qatysty. Kompanııa Irak, Lıvııa jáne Soltústik Afrıkadaǵy ınfraqurylymdyq jobalardy qosa alǵanda, 60-tan astam elge ónimderin eksporttaıdy. Tsement eksportynyń jalpy kólemi jylyna 6-8 mıllıon tonnany quraıdy.
«Erdemir Group («Ereğli Demir ve Çelik Fabrikaları T.A.Ş.») Túrkııadaǵy eń iri bolat óndirýshi kompanııa. Erdemir Group damyǵan logıstıkalyq ınfraqurylymǵa jáne kópirlerdi, ǵımarattardy jáne basqa da iri nysandardy salý úshin qajetti prokat óndirisine ıe. «Erdemir» Irak, Sırııa, Lıvııa jáne Parsy shyǵanaǵy elderindegi iri jobalarǵa belsendi túrde qatysady. Mysaly, 2022 jyly kompanııa 7 mıllıon tonnadan astam bolat eksporttady, onyń basym bóligi halyqaralyq qurylys jobalarynda paıdalanyldy.
Akçansa Çimento – nemis HeidelbergCement kompanııasynyń birlesken kásiporny. Kompanııa Túrkııadaǵy tsement naryǵynda kóshbasshy jáne kórshi elderde óz qyzmetterin belsendi túrde ilgeriletýde. Akçansa Çimento halyqaralyq jobalar úshin artyqshylyq bolýy múmkin joǵary ekologııalyq óndiris standarttarymen tanymal. Túrik merdigerler odaǵynyń málimetinshe, kompanııa Irak, Saýd Arabııasy jáne Egıpettegi iri jobalarǵa belsendi tsement jetkizýshi. Lıvııada Akçansa Çimento 500 km-den astam jol ınfraqurylymyn qalpyna keltirýge qatysty.
Túrik úkimeti halyqaralyq jobalarǵa qatysý úshin jeńildikter men sýbsıdııalar berý arqyly osy kásiporyndardyń barlyǵyna qoldaý kórsetedi. Sırııa jaǵdaıynda túrik merdigerlerine qalpyna keltirý jumystaryna qatysýǵa basym quqyq beretin ekijaqty kelisimder de bolýy múmkin.
Sarapshylardyń pikirinshe, aldaǵy aılarda tsement pen bolatqa suranys artady, óıtkeni Sırııanyń qıraǵan ınfraqurylymy tez arada qalpyna keltirýdi qajet etedi.
Sondyqtan Túrkııa aımaqtaǵy óz múddesin, sonyń ishinde qurylys jobalaryna qatysýdy belsendi túrde alǵa jyljytǵa tyrysady. Bul onyń ekonomıkalyq yqpalyn kúsheıtip qana qoımaı, Túrkııanyń ózinde qosymsha jumys oryndaryn ashady, bul eldiń ishki ekonomıkasy úshin mańyzdy.
Osyǵan deıin Túrkııadaǵy sırııalyqtardyń óz eline aǵyla bastaǵanyn jazdyq.
