Sırııamen saýda-sattyqqa qaýip tónip tur: túriktiń mal eti ónimderiniń eksporty toqtatyldy
ASTANA. KAZINFORM – Sırııada ımport taýarlarǵa salynatyn baj salyǵynyń 500%-ǵa deıin kúrt kóterilýi Túrkııa eksportynyń toqtatylýyna ákeldi, dep habarlaıdy Kazinform agenttiginiń menshikti tilshisi.
Jerorta teńizi aımaǵy balyq jáne mal sharýashylyǵy eksporttaýshylar odaǵy (ASHİB) tóraǵasynyń orynbasary Álı Djan ıAmanıylmaz atap ótkendeı, buryn túrik mal ónimderi eksportynyń 11-shi eń úlken naryǵy bolǵan Sırııa Túrkııamen saýda qarym-qatynasynda úlken daǵdarysqa ushyrady.
- Baj salyǵyn arttyrý eksporttyq shyǵyndarymyzdy kúrt ósirip, suranysty azaıtyp, naryqtyń joǵalýyna ákelip otyr, - dep atap ótti ıAmanıylmaz.
Ol bul másele ásirese Jerorta teńizi aımaǵynan eksporttaýshylarǵa qatty áser etetinin qosyp ótti. Odaq tóraǵasynyń aıtýynsha, 2024 jyly Túrkııanyń Sırııaǵa eksport kólemi quny 96,8 mln dollarǵa 60 myń tonna ónimdi quraǵan. Alaıda 11 qańtardan bastap baj salyǵy kúrt kóterilip, shekarada taýar jınalyp, tońazytý jaǵdaılary bolmaǵandyqtan tez buzylatyn ónimderdiń buzylý qaýpine ákeldi.
Joǵary baj salyǵy sondaı-aq endi ımporttyq ónimderdiń baǵasyn anyqtaı almaı otyrǵan sırııalyq kásipkerlerge de keri áserin tıgizdi.
- Qalyptasqan jaǵdaı Sırııamen saýda-sattyqty is júzinde múmkin emes etip otyr. Bul bıznes úshin de, tutynýshylar úshin de qaýip týdyryp, zańsyz saýda úlesin arttyrady. Budan basqa, saýda sórelerindegi baǵanyń ósýi satyp alý qabiletiniń tómendeýine jáne onsyz da ashtyq sheginde turǵan Sırııa halqynyń azyq-túlik qaýipsizdiginiń nasharlaýyna ákeledi, - dedi ol.
Eksporttaýshylar tarıfterdiń kóterilýi týraly sheshim qaıta qaralyp, dıplomatııalyq kúsh-jiger turaqty saýda qatynastaryn qalpyna keltiredi dep úmittenip otyr.
Buǵan deıin Sırııa túrik taýarlaryna kedendik baj salyǵyn kúrt arttyrǵanyn jazǵan bolatynbyz.