Sırııalyq oppozıtsııa óz kóshbasshysyn tańdady
ASTANA. 10 qarasha. QazAqparat - Osy kúnderi Katar astanasy Dohada sırııalyq oppozıtsııa ókilderiniń kezdesýi aıaqtalýǵa jaqyn.
Onda Sırııanyń qazirgi prezıdenti Bashar Asad qarsylastarynyń barlyǵyn bir qurylymǵa biriktirý perspektıvasy talqylanýda.
Oppozıtsııanyń negizgi uıymy Sırııa ulttyq keńesi (SUK) Sırııa hrıstıandyq kúshteriniń ókili Djordj Sabrany kóshbasshy bolǵandyǵyn jarııalap ta úlgerdi. Saılanǵan tulǵa taıaý alty aı boıy oppozıtsııaǵa basshylyq jasaıdy dep josparlanǵan.
Dj.Sabra Sırııa ulttyq keńesiniń bas hatshysy bolyp saılaý nátıjesinde tańdap alyndy. Oǵan 48 daýystyń 28-i berilgen bolatyn. Sırııa oppotsııasynyń atqarýshy organyna 11 múshe saılandy, olardyń qatarynda buǵan deıin SUK-niń tóraǵasy bolǵan Abdýlvaset Sıda da kirip otyr.
Arab BAQ-tarynyń habarlaýynsha, Dj.Sabra sońǵy ýaqytta Túrkııany turaqty meken etken. Ol kórnekti sırııalyq dıssıdent sanalady, saıası kózqarasyna baılanysty birneshe márte Sırııa túrmelerinde otyrǵan.
