Sırııalyq bosqyndardyń 95 paıyzy Iordanııany panalaýda (VIDEO)
Mıgranttar shatyrlardy panalaǵandyqtan, tabıǵattyń túrli tosyn minezine tózýge májbúr,-dep habarlaıdy 24.kz. Al mamandar «dalalyq ómirde tazalyq bolmaǵandyqtan, adamdar arasynda juqpaly aýrýlar taralýy múmkin» dep qaýiptenip otyr.
Bul - 34 jastaǵy Sırııa azamaty Haled Mallak. Ol áıeli men alty balasyn ertip týǵan jeri Damaskini tastap ketken. Búginde «Azrak» lagerin panalaǵan bosqyndardyń biri. Aıtýynsha, munda qaıyrymdylyq uıymdarynyń jetkizetin azyq-túligin alý úshin uzyn-sonar kezekte turatyny bolmasa, ash qursaq emes.
- Osynda turyp jatqanyma úsh aı ótti. Shaǵymdanbaımyn. Biraq jetisip otyrmyz deýge de kelmeıdi. Ásirese, balalarǵa qıyn. Aınalamyzda tyshqan men túrli jándikter órip júredi»,-deıdi Haled Mallak. Halyqaralyq shart boıynsha Iordanııa kúnine 300 bosqyn qabyldaýǵa kelisim bergen. Alaıda munda kiretin árbir adam jiti tekseriledi. Sebebi Koroldik bıligi aǵylǵan bosqyndarmen birge shekaradan lańkester de kirip kete me dep qaýiptenedi. Iordanııa úkimetiniń ókili Mohammad ál-Momanıdiń aıtýynsha, «Irak pen Levant lańkestik tobynyń» osy óńirge de kelýi ábden múmkin. «Sondyqtan bul máselege beıjaı qaraı almaımyz. Biz úshin el turǵyndarynyń qaýipsizdigi birinshi orynda»,-deıdi ol.
Iordanııa - soǵystan qashqan sırııalyqtardyń bas saýǵalap baratyn birinshi mekeni. Koroldik bul elden kelgenderdiń 95%-yna pana bolǵan. Qolynda qarjysy bolyp Túrkııa, Eýropa asqandar da jeterlik. Biraq kóbi osynda turaqtap jatyr. Memleket syrttan kelgenderge kómek berýde. Biraq onyń qashanǵa deıin sozylary belgisiz. Sebebi Koroldikke qolushyn beretin halyqaralyq uıymdar ketken shyǵynnyń jartysyn ǵana jabady.