Sırııalyq qylmysker 15 jyldan keıin Germanııadan óz eline deportatsııalandy

ASTANA. KAZINFORM — Germanııa Sırııadaǵy soǵys bastalǵannan beri alǵash ret Sırııa azamatyn otanyna deportatsııalady, dep habarlaıdy DW agenttigi.

Soltústik Reın-Vestfalııa shtatyndaǵy túzeý mekemesinde jazasyn ótegen 37 jastaǵy er adam Damask bıligine tapsyryldy.

Ol erekshe aýyr tonaý, dene jaraqatyn salý jáne bopsalaý úshin sottalǵan. Sırııalyq Germanııaǵa 2015 jyly kelgen, biraq jasaǵan qylmystaryna baılanysty Gelzenkırhen ımmıgratsııalyq keńsesi onyń turýǵa ruqsatyn uzartýdan bas tartyp, elden ketýge buıryq bergen.

Talap óz erkimen oryndalmaǵan soń, bılik ony májbúrli túrde deportatsııalaýǵa buıryq berdi. Er adam polıtsııanyń súıemeldeýimen Sırııaǵa jetkizildi.

Nemis aqparat quraldarynyń habarlaýynsha, bul 2011–2012 jyldardan beri sırııalyqty alǵash ret deportatsııalaý. Saıası sarapshylar muny mańyzdy sımvoldyq qadam jáne eldiń kóshi-qon saıasatyndaǵy eleýli pretsedent dep ataıdy.

Sonymen birge nemis bıligi kezekti deportatsııa jasady. Qasaqana dene jaraqatyn salǵaný úshin sottalǵan Bavarııadan Aýǵanstanǵa jiberildi. Bul sońǵy ýaqyttaǵy ekinshi operatsııa.

Germanııanyń Іshki ister mınıstri Aleksander Dobrındt úkimettiń saıasaty berik bolyp qala beretinin málimdedi: qylmyskerler men qoǵamdyq qaýipsizdikke qaýip tóndiretin adamdar elden ketýi kerek. Ol baqylaýdy, júıelilikti jáne qylmystyq quqyq buzýshylyqtarǵa múldem tózbeýdi erekshe atap ótti.

Aýǵanstan men Sırııaǵa deportatsııalaý basqarýshy koalıtsııanyń kelisiminde bekitilgen. Nemis bıligi Sırııaǵa áýe reısteriniń qaıta jandanýy eldegi sońǵy bir jyldaǵy saıası jaǵdaıdyń ózgerýiniń arqasynda múmkin bolǵanyn atap ótti.

Aıta keteıik, jeltoqsan aıynyń alǵashqy onkúndiginde AQSh ırandyqtardyń ekinshi tobyn deportatsııalady.