Sırııaǵa qarsy aqparattyq, dıplomatııalyq, saıası, áskerı naýqan júrýde - Sırııa ókili
ASTANA. 25 sáýir. QazAqparat - Qazirgi kezde Sırııadaǵy ahýal qatty úreı týdyrady. Bul týraly búgin Astanadaǵy Eýrazııa medıa forýmynda Sırııanyń Aqparat mınıstrliginiń departament dırektory Nábıl Omran aıtty.
«Sırııada qanquıly soǵys bolyp jatyr. Elde ınfraqurylym kún ótken saıyn qırap jatyr. Atap aıtqanda, bul turǵyda qazirgi soǵys eki baǵytta júrýde. Máselen, sırııalyq ásker men sodyrlar arasynda qaqtyǵys bolyp jatyr. Sonymen qatar buqaralyq aqparat quraldaryna oryn alǵan maıdan da bar. Sırııaǵa qarsy aqparattyq, dıplomatııalyq, saıası, áskerı naýqandar júrýde. Qazirgi kezde Sırııadaǵy ahýal qatty úreı týdyrady»,-dedi ol.
N. Omrannyń paıymdaýynsha, barsha álemniń kóptegen elderi Sırııaǵa qarsy soǵysyp jatyr. «Búginde Sırııaǵa 70-ten astam el qarsy tur. Bul óte úreıli», - deıdi ol.
