Sırııaǵa 2011 jyly engizilgen ekonomıkalyq shekteýler kúshin joıdy

ASTANA. KAZINFORM — Eýropalyq Odaqtyń syrtqy ister jáne qaýipsizdik saıasaty jónindegi Joǵarǵy ókili Kaııa Kallas Sırııaǵa qarsy ekonomıkalyq sanktsııalardy joıý týraly sheshim qabyldanǵanyn jarııalady, dep jazady Anadoly.

— Búgin Sırııaǵa qatysty ekonomıkalyq sanktsııalardy joıý týraly sheshim qabyldadyq. Biz Sırııa halqyna jańa, ınklıýzıvti jáne beıbit Sırııany qurýǵa kómekteskimiz keledi. EO Sırııa halqyna qoldaý kórsetýdi jalǵastyrady, — dedi Kallas Brıýsselde ótken EO syrtqy ister mınıstrleriniń kezdesýinen keıin óziniń áleýmettik jelidegi paraqshasynda.

EO Sırııaǵa qatysty sanktsııalardy 2011 jylǵy mamyrda, elde azamattyq soǵys bastalǵannan keıin engizgen bolatyn.

Bul shekteýlerge mynalar kirdi:

• Jeke tulǵalarǵa qatysty sharalar: saparlarǵa tyıym salý, aktıvterdi buǵattaý. Bul sharalar rejımmen baılanysy bar jáne adam quqyqtaryn buzýǵa qatysy bar dep esepteletin adamdarǵa qoldanyldy. Olardyń arasynda Bashar Asadtyń seriktesteri men mınıstrler de bar.

• Salalyq sanktsııalar: shıki munaı men munaı ónimderin ımporttaýǵa tyıym, qos maqsattaǵy (áskerı jáne azamattyq) taýarlar eksportyna shekteý, keıbir baılanys quraldary men ınfraqurylymdyq jobalarǵa qarjylandyrýdy shekteý.

2025 jylǵy 24 aqpanda, rejımniń qulaýynan keıin, EO sanktsııalardy birtindep toqtatý týraly alǵashqy sheshimin qabyldady. Bul sheshim bank isi, energetıka jáne kólik salalaryn qamtyǵan.

EO ókilderi sanktsııalardy alyp tastaý — keri qaıtarylatyn protsess ekenin jáne Sırııadaǵy jaǵdaı qatań baqylaýda ekenin atap ótti.

Budan buryn Reseı Bashar Asadty Sırııaǵa ekstradıtsııalaýdan bas tartqanyn jazǵan edik.