Sırııadan oralǵan otbasylardyń balalaryn qoǵamǵa beıimdeý jumystary júrgizilýde

ASTANA. QazAqparat - Qazaqstannan Sırııaǵa attanyp, qaıta oralǵan otbasylardyń balalary arnaıy ortalyqtarda tárbıelenip, olardy qoǵamǵa beıimdeý jumystary júrgizilýde. Bul týraly Astanada tilshilerdiń din salasynda aqparat berýin jetildirýge arnalǵan oqytý trenınginde QR Qoǵamdyq damý mınıstrligi Qoǵamdyq kelisim komıteti tóraǵasynyń orynbasary Balǵabek Myrzaev málim etti, dep habarlaıdy QazAqparat tilshisi.

«Álbette, bul másele boıynsha arnaıy quqyq qorǵaý organdary júrgizgen jumystar bar. Solarǵa súıenip aıtar bolsaq, qazirgi ýaqytta elimizdiń 300-ge tarta azamaty Sırııada degen aqparat bar. Biraq, olardyń qanshasy qaıtys boldy, qanshasy áli sol jaqta ómir súrip jatyr degen suraqtarǵa qatysty naqty málimet aıtý qıyn. Biraq, biz osy máseleni únemi nazarda ustap otyrmyz. Ásirese, ata-analary sol jerde júrip qaıtys bolǵan balalar týraly aqparat jarııalanyp jatyr ǵoı. Basty maqsatymyz - Qazaqstannan barǵan qazaq balalaryn elge alyp kelip, olardy arnaıy ortalyqtarda qaıtadan bizdiń qoǵamǵa beıimdep, qoǵamnyń tolyqqandy múshesi qylý jumysy josparymyzda bar», - deıdi Balǵabek Myrzaev.

Qoǵamdyq kelisim komıteti tóraǵasynyń orynbasarynyń aıtýynsha, Bilim jáne ǵylym mınıstrligimen birlesip, bul joba jasalyp ta qoıǵan.

«Qazirgi ýaqytta sol balalardy qalaı elge ákelý máselesi tolyq sheshim tapqan joq. Óıtkeni, kópshiliginiń qujattary joq. Ata-analary qaıtys bolǵannan keıin balalardyń DNK-syn zertteý kerek. Memleket sol jaqtaǵy el azamattarynyń balalaryn qaıta alyp kelip, tárbıeleýdi josparlap otyr. Óıtkeni, balalar jazyqsyz. 150-ge jýyq bala bolatyn bolsa, meniń estýim boıynsha olardyń jartysynan jýyǵy 2-7 jas aralyǵyndaǵy balalar. ıAǵnı, olar qalyptaspaǵan, ol jaqqa baryp jıhad jasaımyn degen oıdy túsinbegen balalar bolǵannan keıin biz olardy elge alyp kelip, tárbıelesek, oqytsaq, balalar qoǵamnyń tolyqqandy múshesi bolady degen senimdemiz», - deıdi Balǵabek Myrzaev.

Onyń aıtýynsha, Sırııadan osy kúnge deıin 3-4 bala kelgen. Olardyń ishinde anasymen birge nemese ata-anasyz kelgenderi de bar.

«Bizde qazir Aqtóbede 3-5 otbasynyń jubaıy qaıtys bolyp, áıeli balasyn Qazaqstanǵa qaıtyp ákelgen jaǵdaılar bar. Olardyń balalaryn biz arnaıy ortalyqtarda qazir oqytyp jatyrmyz. Ol balalar mektepke baryp, olarmen arnaıy psıhologtar jumys atqarýda. Al jappaı kelý boıynsha áli jumys bastalǵan joq», - deıdi Balǵabek Myrzaev.

Komıtet tóraǵasynyń orynbasary Sırııadan qaıtyp kelgen azamattardy (eresekter) qoǵamǵa qaıta beıimdeý óte kúrdeli protses ekenin atap ótti.

«Mysaly, olardyń kópshiligi sol jaqta qarýly jıhadqa qatysqan, qolyna qarý alyp soǵysqan azamattar. Bizde tek bir ǵana shart bar: eger shynynda da, azamat aldanyp baryp qalǵan bolsa nemese qarýly qaqtyǵysqa qatyspaǵany dáleldengen jaǵdaıda biz olardy arnaıy beıimdeý ortalyǵyna aparyp, ońaltý jumysyn atqaramyz. Al eger jıhadqa qatysqan azamattar boıynsha, endi bul jerde tıisti qylmystyq is qozǵalyp, eger adam óltirgen bolsa, mindetti túrde bas bostandyǵynan aıyrýǵa deıingi sharalar qoldanylady», - dedi Balǵabek Myrzaev.