Sırııadan qaıtarylǵan 7 jasar qyz jaqynda týystaryna tabystalady

ASTANA. QazAqparat – Sırııada sodyr bolǵan qazaqstandyqtyń 7 jasar qyzy 11 naýryzda elge jetkizildi. Qoldaý ortalyǵyna ornalastyrylǵan búldirshin jaqynda týystaryna tabystalmaq, dep habarlaıdy QazAqparat Ulttyq qaýipsizdik qyzmetine silteme jasap.

Qazaqstan Respýblıkasynyń Ulttyq qaýipsizdik komıteti múddeli memlekettik organdarmen, sondaı-aq sheteldik seriktesterimen birlesip, azamattardy terrorıstik belsendilik aımaqtarynan qaıtarý boıynsha qarqyndy jumysty jalǵastyryp jatyr.

11 naýryz kúni Sırııada sodyr bolǵan qazaqstandyqtyń 7 jasar qyzy elge jetkizildi. Ony qaıtarý boıynsha gýmanıtarlyq operatsııa jarty jyldan astam ýaqyt boıy júrgizilgen.

Qazir búldirshin Astana qalasynyń balalardy qoldaý ortalyǵynda, psıhologııalyq jaı-kúıi qanaǵattanarlyq. Ony medıtsınalyq tekserýden ótkizip, beıimdeý jáne ońaltý jumystary júrgizilip jatyr. Jaqynda týystarynyń qatarynan qamqorshylarǵa beriletin bolady.

Aıta ketsek, 2019 jyldan bastap UQK terrorıstik belsendilik aımaqtarynan 518 kámeletke tolmaǵan balany, onyń ishinde 34 jetimdi Qazaqstanǵa qaıtardy.