Sırııadan qaıtarylǵan 16 er adam lańkestik kúdigi boıynsha tutqyndaldy

NUR-SULTAN. QazAqparat -QR Ulttyq qaýipsizdik komıtetiniń departament basshysy Baqytbek Rahymberdıev Sırııadan qaıtarylǵandar Qazaqstannyń qaı óńirlerinen barǵanyn aıtty, dep habarlaıdy QazAqparat tilshisi.

«Qaıtarylǵan 156 balanyń arasynda 18-i jetim. Olardyń ata-anasy qarýly qaqtyǵys aımaqtarynda qaıtys bolǵan nemese habar-osharsyz joǵalǵan. Olardyń ishinde 7 jasqa deıin 107 bala, 7-12 jas aralyǵynda 43 bala, al 12 jastan asqan 6 bala bar. Balalardyń jartysynan kóbi shetelde ómirge kelgen. Jalpy, «Jýsan» operatsııasynyń ekinshi kezeńinde elge qaıtarylǵan azamattar Nur-Sultan, Almaty qalalary, sondaı-aq Almaty, Atyraý, Batys Qazaqstan, Aqtóbe, Aqmola, Qaraǵandy, Túrkistan, Mańǵystaý oblystarynyń týmalary bolyp sanalady», - dedi B. Rahymberdıev «Jýsan-2» operatsııasyna qatysty ótken baspasóz máslıhatynda.

Onyń sózine qaraǵanda, Qazaqstanǵa kelgennen keıin 16 er adam men 4 áıel DAISh jaǵynda terrorıstik is-áreketke qatysy bar degen kúdikpen tutqynǵa alyndy. Olar qylmystyq isterin tergeý oryndary boıynsha Nur-Sultan, Atyraý, Oral, Aqtóbe, Qaraǵandy jáne Shymkent qalalaryna berildi.

«Qalǵan 55 áıel balasymen birge Aqtaý qalasy mańyndaǵy arnaıy ońaltý ortalyǵyna bir aı merzimge ornalastyryldy. Medıtsınalyq tekserister ótkizilip, karantın belgilendi. Qosymsha olarmen birge psıhlogtar, teologtar, úkimettik emes uıymdardyń qyzmetkerleri jumys júrgizýde. Qujattaryn qalpyna keltirý boıynsha kómek kórsetildi. Sonymen birge, olardyń terrorıstik is-áreketterge qatysýy boıynsha tekserý júrgizilip jatyr. Kedergi keltiretin jaǵdaılar bolmaǵanda, karantın merziminiń aıaqtalýymen áıelder men balalar burynǵy mekenjaılaryna qaıtarylady», - dedi UQK ókili.

Aıta keteıik, Syrtqy ister mınıstriniń orynbasary Erjan Ashyqbaev Sırııadan qaıtarylǵan adamdardyń lańkestik qylmystarǵa qatysy barlary jazaǵa tartylatynyn málim etti.

Budan buryn habarlanǵandaı, jaqynda Sırııadan 231 Qazaqstan azamatynyń elge jetkizilýine baılanysty QR Prezıdenti Qasym-Jomart Toqaev málimdeme jasady.

«Meniń tapsyrmam boıynsha 7 jáne 9 mamyr kúnderi Sırııadan 231 Qazaqstan azamaty elge jetkizildi, onyń 156-sy - balalar, deni mektep jasyna deıingiler, sonyń ishinde 18-i - jetim balalar. Bul aýqymdy gýmanıtarlyq aktsııa - Tuńǵysh Prezıdent - Elbasy Nursultan Nazarbaevtyń tapsyrmasymen bıyl qańtar aıynda júrgizilgen «Jýsan» operatsııasynyń jalǵasy», - delingen Memleket basshysynyń málimdemesinde.

Eske salsaq, bıyl qańtarda Elbasy Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasady.