Sırııadan elge oralǵan aqtóbelik áıel sottaldy
Aqtóbe qalalyq №2 sotynda «Jýsan» operatsııasy aıasynda elge jetkizilgen sottalýshy Zarına Aqmalevaǵa qatysty qylmystyq is qaraldy. 30 jastaǵy kelinshektiń eki balasy bar. Biri Aqtóbede, ekinshisi Sırııa elinde ómirge kelgen.
«2011 jyly ajyrasqanmyn. Eki balam bar. Biri 11, ekinshisi 2 jasta. Sırııaǵa ketkende úlken qyzymdy ózimmen birge alyp kettim. Qazir eki qyzym da anamnyń tárbıesinde. Olardyń naǵashy ájesiniń tárbıesinde bolǵanyn qalaımyn. Ózim mektep bitirgen soń turmysqa shyqtym, satýshy bolyp jumys istedim, joǵary bilim almadym», - dedi sottalýshy Z.Aqmalaeva.
Sot otyrysy kezinde aýdıo, vıdeo túsirilim jasaýǵa tyıym salyndy. Prokýror Baýyrjan Qalı da ózin fotoǵa túsirýge qarsylyq tanytty.
«Zarına Aqmalaevaǵa Qylmystyq Kodekstiń «Terrorızmdi nasıhattaý nemese terrorızm aktisin jasaýǵa jarııa túrde shaqyrý», «Áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý» baptary boıynsha aıyp taǵyldy. Ol 2014 jyldyń 23 maýsymda Astana qalasynan «Astana - Ystanbul» áýe reısimen Túrkııaǵa ushyp ketti. Ári qaraı Sırııaǵa bardy. 2015 jyldyń 15 qarashasy kúni saǵat 18:30-da terrorızmdi nasıhattaıtyn, dinı alaýyzdyq týdyratyn mátindi «WhadsApp» messendjeri arqyly jiberdi. Mátini «Hıtryı plan», «Novye metody» «Svejıe rany» dep bastalyp, «Na djıhad vyhodıte» dep aıaqtalǵan. 2015 jyldyń 27 qarashasynda saǵat 22:58-de óz telefonynan anasyna hat jiberdi. Onda da «ıA sovetýıý vam ıdtı na djıhad» degen sóz jazylǵan. 2016 jyldyń 22-qańtarynda anasyna terrorızmdi nasıhattaǵan aýdıo jazba joldaǵan. Habarlamalar Saada qalasynan jiberilgen», - dedi prokýror Baýyrjan Qalı.
Aıyptaý qorytyndysyna súıensek, mátinge saraptama jasalyp, terrorızmdi nasıhattaǵany dáleldendi. Aıta keteıik, prokýror men sottalýshy Zarına Aqmalaeva protsesýaldyq kelisimge keldi. Prokýror sottalýshyny 5 jyl bas bostandyǵynan aıyryp, qylmystyq atqarý júıesiniń qaýipsizdigi ortasha mekemesinde jazasyn óteý úkimin taǵaıyndaýdy surady.
«Zarına Aqmalaeva aıypty dep tanylyp, 5 jylǵa bas bostandyǵynan aıyrý jazasy taǵaıyndalsyn. Jazasyn qylmystyq atqarý júıesiniń qaýipsizdigi ortasha mekemesinde ótesin», - dedi sýdıa Alıma Ádilova. Eki balany naǵashy anasyna qaldyrý isi 29-shilde kúni ıývenaldy sotta qaralady. Balalardyń kimde qalatynyn qorǵanshylyq organdary sheshedi.
Eske salsaq, buǵan deıin «Jýsan» operatsııasy aıasynda elge jetkizilgen Aqmaral Almaǵambetovamen jańa protsesýaldyq kelisim jasaý úshin is prokýratýraǵa qaıta jiberilgen bolatyn.
