Sırııadan eki balasymen birge Qazaqstannyń taǵy bir azamatshasy elge jetkizildi
ASTANA. 22 maýsym. QazAqparat - Juma, 21 maýsym kúni Qazaqstan Respýblıkasynyń Iordanııadaǵy jáne Lıvandaǵy Elshiligin qosa atqarýshy dıplomatııalyq ókildiktiń kúshimen
Sırııa Arab Respýblıkasynan 2000 jáne 2007 jyldarǵy kámeletke tolmaǵan eki balasy bar QR-dyń kezekti azamatshasy elimizge jetkizildi. Almaty qalasynyń týmasy 1975 jylǵy Olesıa Abý Hasýn Sırııanyń Sýeıda qalasynda turyp kelgen. Onyń aıtýynsha, ol Sırııada ahýal turaqtanatyndyǵyna úmittengen. Biraq, elde jalǵasyp otyrǵan qarýly qaqtyǵystar men ómirge degen qaýip ony eldi tastap, Qazaqstanǵa oralýǵa májbúr etken.
Qazaqstan Elshisi Bolat Sársenbaevtyń sózine qaraǵanda, Sırııada qazaqstandyq dıplomattarǵa belgili QR-dyń 40-qa jýyq azamaty qalyp otyr. Konsýldyq esepke turmaǵan jáne osy arab respýblıkasynyń terrıtorııasynda turyp jatqan beımálim tulǵalardyń esebinen azamattarymyzdyń sany odan da kóp bolýy múmkin.
QR azamattaryn qaqtyǵys jerlerinen elge aman-esen qaıtarý máselesi Qazaqstan Respýblıkasy Syrtqy ister mınıstrliginiń basqarýymen qazaqstandyq dıplomatııalyq ókildikterdiń turaqty baqylaýynda. Osy rette, azamattarymyzdy otanǵa qaıtarý úshin áýe bıletteri elimizdiń arnaıy úkimettik bıýdjettik baǵdarlamasy aıasynda satyp alynyp otyrǵanyn atap ótý qajet.
