Sırııadaǵy jetimdik: Soǵysta ólgen qazaqstandyqtardyń balalary lagerlerde bosyp júr
"Qazirgi kezde Sırııada qalǵan qazaqstandyq balalar týraly naqty málimetti eshkim bere almaıdy. Ulttyq qaýipsizdik qyzmetinde de ondaı derek joq. Sebebi shetelge shyǵý - Qazaqstan azamattarynyń konstıtýtsııalyq quqyǵy. Olardyń qalaı jáne qaı memleket arqyly áskerı aımaqtarǵa baryp jatqanyn eshkim baqylap jatqan joq. Ondaı azamattar konsýldyq tirkeýge turmasa, olardy elge qaıtarý qıyn. Al áskerı qaqtyǵystarda qaıtys bolǵan qazaqstandyqtar az emes. Olardyń balalary bosqyndar lagerlerinde qaldy. Qazirgi kezde biz sol balalardy anyqtaý boıynsha tıisti sharalardy atqaryp jatyrmyz", - dedi QR Syrtqy ister mınıstrligi Konsýldyq qyzmet departamentiniń dırektory Ardaq Madıev Astanada ótken baspasóz máslıxatynda.
Onyń aıtýynsha, qazaqstandyq balalardy tabý ońaı sharýa emes. Sebebi olardyń ishinde kishkentaı balalar da bar. "Olar qaıdan jáne qashan kelgenin aıta almaıdy. Sebebi áskerı qaqtyǵystar aımaǵynda júrgenderine úsh-tórt jyl boldy. Sol jerde týǵan da shyǵar. Qazirgi kezde biz quziretti organdarmen birlese otyryp, ol balalardy qaıtarý boıynsha arnaıy jospardy daıarlap jatyrmyz. Árıne, olardy deradıkalızatsııalaý jaǵyn da oılastyrýymyz qajet. Óıtkeni ondaı azamattardy beıbit ómirge beıimdeý kerek. Negizgi másele - sol jaqta qalyp qoıǵan balalardy ıdentıfıkatsııalaý. Bálkim, telearnalardyń bireýi ondaı lagerlerge baryp, eki-úsh jaqsy reportaj túsirip kórsetse, osy jaqtaǵy týǵan týystary tanyp qalatyn shyǵar. Sonda tıisti qujattardy rásimdep, evakýatsııalaý sharalaryna kirisýge bolady", - dep atap A.Madıev.