Sırııadaǵy jer silkinisi qurbandarynyń sany 3574-ke jetti

ASTANA. QazAqparat – Sırııada joıqyn jer silkinisterinen zardap shekken provıntsııalarda izdeý-qutqarý jumystary jalǵasyp jatyr, dep habarlaıdy QazAqparat tilshisi Anadolý agenttigine silteme jasap.

Іzdeý-qutqarý jumystary zilzaladan zardap shekken Idlıb, Aleppo, Hama, Lazkıe jáne Tartýs provıntsııalarynda júrip jatyr.

Jergilikti derekkózderdiń málimetinshe, Idlıb provıntsııasynda jáne «Evfrat qalqany» men «Záıtún butaǵy» operatsııalary aımaqtarynda 2 166 adam qaza taýyp, 2 950-den astam adam zardap shekti.

Sana agenttiginiń habarlaýynsha, Bashar Asad rejımi baqylaýyndaǵy Aleppo, Lazkıe, Hama jáne Tartýs provıntsııalarynda 1 408 adam qaıtys boldy, 2 341 adam zardap shekti. Osylaısha, Sırııadaǵy tabıǵı apat qurbandarynyń jalpy sany 3 574-ke deıin ósti.

Eske salsaq, 6 aqpanda Túrkııada jeti baldan asatyn eki jer silkinisi boldy. Júzdegen aftershokpen jalǵasqan jerasty dúmpýi eldiń 10 provıntsııasynda, sondaı-aq kórshiles memleketterde de sezildi.

Memleket basshysy Qasym-Jomart Toqaev Sırııaǵa gýmanıtarlyq kómek berýdi tapsyrdy.

Azyq-túlik qaýipsizdigi jónindegi Islam uıymynyń (IOFS) qoldaýymen jer silkinisinen zardap shekken Sırııaǵa 50 tonna gýmanıtarlyq kómek jetkizildi.