Sırııadaǵy jer silkinisi: Álem bilmeıtin tragedııa jaıynda
Óz kúshterine senýde
Aleppo ólkesi Sırııa damý qorymen birlesip, jer silkinisi saldarynan otbasynan aıyrylyp qalǵan balalardy qabyldaý úshin oryn bóle bastady. Al Sırııanyń birqatar óńiri zilzaladan qatty zardap shekken aýdandarǵa kómek jóneltýde. Aıtalyq, Homs pen Deır az-Zor ólkeleri Latakııa, Aleppo jáne Hama ólkelerinde zardap shekken turǵyndarǵa gýmanıtarlyq kómek, medıtsınalyq zattar men azyq-túlik túrleri tonnalap tıelgen avtokólikter legin jiberdi. Eldiń Densaýlyq saqtaý mınıstrligi zardap shekkenderge psıhologııalyq jáne áleýmettik qoldaý kórsetetin toptyń jasaqtalatynyn málimdedi.
Foto: sana.sy/ru
Buǵan qosa, Sırııanyń Ortalyq banki jerasty dúmpýi saldarynan týyndaǵan biregeı jaǵdaı retinde barlyq bankke, aqsha aıyrbastaý oryndary men aqsha aýdarymyn júzege asyratyn ózge de kompanııalarǵa juma men senbi kúnderi de bólimshelerin ashýǵa ruqsat berdi. Ádette Taıaý Shyǵys elderiniń basym bóliginde bul kúnder demalys sanalady.
Sonymen qatar Sırııa Mınıstrler keńesi Aleppo, Latakııa, Hama jáne Idlıb ólkelerin jer silkinisi saldarynan apat aımaǵy dep jarııalady.
Sırııa Densaýlyq saqtaý mınıstrliginiń málimetine sáıkes, Úkimet baqylaýyndaǵy aýmaqtarda silkinis saldarynan 1 347 adam mert bolyp, 2 295 adam jaraqat alǵan. Al Úkimet baqylaýyna jatpaıtyn Sırııanyń soltústik-batys aýmaǵynda qaza tapqandar 2 037 adamǵa jetip, 2 950 adamnyń jaralǵany belgili. Osylaısha, Sırııa boıynsha jer silkinisinen 3 384 adam mert bolyp, 5 245 adam jaraqattanǵan.
Foto:referansturk.com
Foto:Chaith Alsayed/AP
10 aqpan kúni Sırııa prezıdenti Bashar Asad Aleppodaǵy al-Masharek aýdanyna baryp, jaralanǵandardy tabý úshin úıindiler men qırandylardy tazartyp jatqan qutqarý komandasynyń jumysymen tanysty. Bul jaıynda Prezıdent keńsesi resmı habarlama taratty. Sondaı-aq ol jubaıy Asma Asadpen birge Aleppo ýnıversıtetiniń arýhanasynda jatqan jaraly turǵyndarǵa da barǵan.
Foto: facebook.com/SyrianPresidency
Halyqaralyq kómek jetkizilýde
Sırııa áýejaıyna bortynda gýmanıtarlyq júk tıelgen ushaqtar úzdiksiz kelip jatyr. Eldiń Kólik mınıstrliginiń málimetinshe, jer silkinisi oryn alǵan sátten beri Damask, Aleppo jáne Latakııa qalalarynyń áýejaılaryna túrli kómek artylǵan 40 ushaq ushyp kelgen. Kómek kórsetken elderdiń arasynda Iran, Birikken Arab Ámirlikteri, Aljır, Týnıs, Iordanııa, Mysyr, Armenııa, Reseı, Oman, Úndistan, Lıvııa, Pákistan jáne Venesýela elderi bar. Munan bólek Sırııamen kórshiles Irak pen Iordanııa Arab respýblıkasyna jerústi kóligimen gýmanıtarlyq júk tıelgen kolonna jiberdi.
Foto: sanasyria.org
Qazaqstan da Sırııa eline kómek kórsetýden tys qalǵan joq. 9 aqpan kúni Memleket basshysy Qasym-Jomart Toqaev Úkimetke Islam yntymaqtastyq uıymy arqyly Sırııaǵa gýmanıtarlyq kómek jiberýdi tapsyrdy. Al keshe Úkimet úıinde QR Premer-Mınıstriniń birinshi orynbasary Roman Sklıardyń tóraǵalyǵymen Halyqaralyq gýmanıtarlyq kómek máseleleri jónindegi komıssııanyń otyrysy ótti. Otyrysta joıqyn jer silkinisterinen zardap shekken Sırııa Arab Respýblıkasyna 50 tonna gýmanıtarlyq kómek jiberý týraly sheshim qabyldandy.
Memlekettik materıaldyq rezervten konservilengen ónimder, jyly kıim-keshekter, qysqy shatyrlar, kereýetter men tósek-oryn jabdyqtary bólindi. Júk Islam yntymaqtastyǵy uıymynyń jelisi boıynsha Aleppo qalasyna tórt áýe reısimen jetkizilmek. 10 aqpan kúni birinshi ushaq Almaty qalasynan Sırııaǵa ushyp ketti.
Beısenbi kúni Amerıka Qurama Shtattary Túrkııa men Sırııaǵa 85 mln dollar mólsherinde bastapqy shuǵyl kómek toptasy beriletinin jarııa etti. AQSh-tyń halyqaralyq damý jónindegi agenttigi taratqan málimdemede qarjy mıllıondaǵan adamǵa qajetti jedel kómek kórsetý, tamaqpen, baspanamen jáne shuǵyl medıtsınalyq kómekpen qamtý úshin Sırııadaǵy seriktesterge jiberiletindigi aıtylǵan.
Qatar bıligi bolsa taıaýda ótken fýtboldan álem chempıonatynan túsken kirisiniń bárin tabıǵı apattan zardap shekken Túrkııa men Sırııaǵa beretindigin málim etti. Mundaı habardy túrik buqaralyq aqparat quraldary jazyp jatyr.
Foto:AFP
Sanktsııa lar ýaqytsha toqtatylady
AQSh-tyń Qarjy mınıstrligine qarasty sheteldik aktıvterdi baqylaý basqarmasy (OFAC) Sırııaǵa qarsy sanktsııany 180 kúnge jeńildetý týraly qaýly qabyldady. Vedomstvo málimdeýinshe, 2023 jyldyń 8 tamyzyna deıin jer silkinisi saldaryn joıýmen baılanysty qyzmet túrleri sanktsııadan shyǵarylady. Bul jeke tulǵalarǵa gýmanıtarlyq kómek kórsetý úshin Sırııadan jáne Sırııaǵa qarajat aýdarýǵa múmkindik beredi.
Foto: twitter.com/SyriaCivilDef
Buǵan deıin Sırııanyń Syrtqy ister mınıstrligi men Úkimettiń resmı tulǵalary elden sanktsııany alýǵa shaqyryp, izdeý operatsııalary úshin, tipti arnaýly tehnıkalardy da jetkize almaı otyrǵandyqtaryn aıtqan bolatyn.
Bosqyndardyń jaǵdaıy kúrdele ne túsýde
Oppozıtsııalyq toptardyń qolastyndaǵy Sırııanyń soltústik-batys aýdandaryna kómek jetkizý óte kúrdeli bolyp tur.
Al-Jazeera agenttiginiń habarlaýynsha, Sırııanyń eń qatty zardap shekken aýdandarynyń biri Djındıreste turǵyndar úıindiler astynda tiri qalǵan otandastaryn izdeý úshin qırandylardy qoldarymen tazartyp jatyr. Osyǵan baılanysty halyqaralyq kómek surap otyr.
Foto: twitter.com/SyriaCivilDef
Beısenbi kúni BUU-nyń halyqaralyq kómegi tıelgen júk kólikteriniń birinshi kolonnasy Túrkııadan shyǵyp, «Bab al-Hava» shekara ótkelin kesip ótti jáne eldiń soltústik-batysyndaǵy Idlıb ólkesine bet aldy. Juma kúni 14 júk kóliginen turatyn dál osyndaı taǵy bir kolonna Idlıbke jetti.
Foto:Reuters
Aıta keterligi, «Bab al-Hava» shekara ótkeli Sırııanyń soltústik-batys aýmaǵynda ruqsat etilgen jalǵyz kólik dálizi sanalady. Qańtar aıynda BUU Qaýipsizdik keńesi dál osy ótkeldi asa mańyzdy júkterdi jetkizý úshin 6 aıǵa ashyq qaldyrýǵa biraýyzdan daýys bergen bolatyn.
Munyń ústine Ası ózeni bógeti buzylyp, jaǵaǵa shyqqan sý Idlıb ólkesindegi birneshe úıdi basyp qalǵan bolatyn.
BUU málimetine sáıkes, Sırııanyń soltústik-batysynda 224 ǵımarat qırap, 325-i búlingen. Idlıb turǵyndarynyń basym bóligi – azamattyq soǵys saldarynan Sırııanyń basqa aýdandarynan kóship kelgender jáne palatkalar men ýaqytsha úılerde turyp jatqan adamdar.
BUU-nyń Búkilálemdik azyq-túlik baǵdarlamasy juma kúni uıymnyń Sırııanyń soltústik-batysyndaǵy qory taýsylýǵa jaqyn ekenin, sondyqtan Túrkııamen aradaǵy shekaralyq ótkelderdiń kópshiligin ashý qajettigin málimdegen edi.
Foto:AR
«Sırııanyń halyqtyń 90 paıyzy turatyn soltústik-batys bóligi gýmanıtarlyq kómekke táýeldi ári qatty alańdaýshylyq týdyrady. Biz adamdardy ol jaqqa jetkizdik. Biraq, bizge qorymyzdy tolyqtyrý qajet», - dedi BUU Búkilálemdik azyq-túlik baǵdarlamasynyń óńirlik dırektory Korınn Fleısher.
Foto:ERA
Basty foto: report.az
