Sırııadaǵy Súleıman shah kesenesi qaýipsiz jerge kóshirildi
ASTANA. QazAqparat - Túrkııa memleketi óziniń el aýmaǵynan tys jatqan strategııalyq nysany sanalatyn Sırııadaǵy Súleıman shah kesenesin qaýipsiz jerge kóshirdi.
Keshe saǵat 21:00-de Túrkııanyń Qarýly kúshteri 39 tank pen 100-den astam áskerı kólik jáne 750 jaýyngermen eki keń aýqymdy operatsııa júrgizdi. Onyń barysynda Súleıman shah kesenesin 8 aıdan beri kúzetip kelgen 44 kúreń beretti sarbaz elge aman-saý qaıtaryldy. Sondaı-aq keseneden memlekettik týlar men belgiler, dinı rásimderdiń saqtalýymen zırattan úsh tabyt qazylyp alyndy. Qazir kesene Sırııanyń Eshmesı aýylyna ýaqytsha kóshirilgenin habarlaıdy haberler.com saıty.
1921 jyly 20 qazanda Túrkııa men Frantsııa úkimetteriniń kelisimimen Osman ımperııasynyń negizin qalaýshy Osman Gazıdiń atasy Súleıman shah kesenesi jáne oǵan tıesili jer aýmaǵy túgelimen Túrkııa Respýblıkasynyń ıeligi dep tanylǵan. Sol sebepti el aýmaǵynan tys jatqan mańyzdy nysandy Túrkııanyń Qarýly kúshteri osy ýaqytqa deıin saltanatty qaraýyl qoıyp, kúzetip kelgen edi. Alaıda Sırııadaǵy lańkestik uıymdardan qarýly shabýyl bolýy múmkin ekendigin eskergen túrik bıligi keseneni qaýipsiz jerge kóshirý jóninde sheshim qabyldady, dep jazady 24.kz.
