Sırııadaǵy Reseı elshiliginiń janynda jarylys boldy
ASTANA. 21 aqpan. QazAqparat - Sırııa astanasy Damask qalasynyń ortalyǵynda jarylǵysh zat salynǵan avtokólik kúlge ushty. Jarylys bılik basyndaǵy Baas partııasynyń shtab-páteri men Reseı elshiliginiń janynda oryn aldy, dep habarlaıdy Ýtro.rý.
Sırııa memlekettik televıdenıesi Mazra aýdanynda oryn alǵan lańkestik oqıǵasy jóninde habarlaıdy, SANA agenttiginiń derekterine sáıkes, «jarylystan kóptegen beıbit turǵyndar qaza tapty jáne jaralanǵan».
Oqıǵa ornynda jumys istegen «jedel járdem» dárigeri «men ózim 40 adamdy jónelttim, biraq zardap shekkenderdiń sany odan edáýir kóp» dep málimdedi.
Sırııada Bashar Asadtyń otstavkasyn talap etip otyrǵan oppozıtsııa men úkimettik jasaqtar arasyndaǵy qaqtyǵys 2011 jyldyń naýryz aıynan beri jalǵasýda. BUU málimetterinshe, osy kezeńde 70 myń adam opat boldy.
