Sırııadaǵy lańkestikke kúdikti qazaqstandyqtardy qandaı jaza kútip tur

NUR-SULTAN. QazAqparat - QR Ulttyq qaýipsizdik komıtetiniń departament basshysy Baqytbek Rahymberdıev Sırııadan qaıtarylǵan azamattardyń lańkestikke qatystylyǵy dáleldengen jaǵdaıda olardy ne kútip turǵanyn aıtty, dep habarlaıdy QazAqparat tilshisi.

«Jaza merzimine toqtalsaq, «Jýsan-1» operatsııasy kezinde elge jetkizilgen eki er adam 8 jylǵa bas bostandyǵynan aıyryldy. Bul turǵyda qylmystyń aýyrlyǵy men olardyń tergeý amaldaryna kómegi jáne óz erkimen kelýi eskerildi», - dedi B. Rahymberdıev Syrty ister mınıstrliginde tilshiler saýalyna jaýap bere otyryp.

Aıta keteıik, búgin atalǵan vedomstvoda «Jýsan-2» operatsııasyna qatysty baspasóz máslıhaty ótti. Jaqynda Sırııadan 231 Qazaqstan azamatynyń elge jetkizilgeni málim. Qazaqstanǵa kelgennen keıin 16 er adam men 4 áıel DAISh jaǵynda terrorıstik is-áreketke qatysy bar degen kúdikpen tutqynǵa alyndy.

UQK ókiliniń atap ótýinshe, kúdiktilerge qatysty jaza qylmystyń aýyrlyǵyna qaraı aıqyndalady.

«Jalpy alǵanda, istegen áreketiniń aýyrlyǵy boıynsha olar 20 jylǵa deıin sottalýy múmkin. ıAǵnı bizde 2017 jyly ekstradıtsııalanǵan lańkestik toptyń bir múshesine 20 jylǵa bas bostandyǵynan aıyrý úkimi shyǵarylǵan edi. Atap aıtqanda, osynda qylmystar úshin uzaq merzim berý qarastyrylǵan», - dedi ol.

Budan buryn habarlanǵandaı, jaqynda Sırııadan 231 Qazaqstan azamatynyń elge jetkizilýine baılanysty QR Prezıdenti Qasym-Jomart Toqaev málimdeme jasady.

«Meniń tapsyrmam boıynsha 7 jáne 9 mamyr kúnderi Sırııadan 231 Qazaqstan azamaty elge jetkizildi, onyń 156-sy - balalar, deni mektep jasyna deıingiler, sonyń ishinde 18-i - jetim balalar. Bul aýqymdy gýmanıtarlyq aktsııa - Tuńǵysh Prezıdent - Elbasy Nursultan Nazarbaevtyń tapsyrmasymen bıyl qańtar aıynda júrgizilgen «Jýsan» operatsııasynyń jalǵasy», - delingen Memleket basshysynyń málimdemesinde.

Eske salsaq, bıyl qańtarda Elbasy Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasady.