Sırııadaǵy qos lańkestik oqıǵa: 28 adam qaza boldy 200-den astamy jaralandy

Eldiń densaýlyq saqtaý mınıstri Vaıl Ál-Halkı osynda natylanǵan derekterdi keltirdi.

RBK-nyń jergilikti SANA aqparattyq agenttigine silteme jasap habarlaýynsha, budan buryn 25 adam qaza bolyp, 175-i jaralanǵany habarlanǵan bolatyn. Al adam quqyqtary jónindegi Sırııadaǵy Baqylaý ortalyǵy lańkestik akti 30 adamnyń ómirin qıdy dep málimdeıdi.

Mınıstrdiń aıtýynsha, qaza bolǵandar sany kóbeıýi múmkin, óıtkeni birqatar zardap shekkender aýyr halde jatyr.

Lańkestik shabýylyna Ál-Mýlhak jáne Ál-Garbı aýdanyndaǵy áskerı barlaý ǵımaraty men Ál-Arkýb aýdanyndaǵy ishki áskerler kazarmasy ushyrady. Jarylystar kindigine jaqyn jerdegi kóptegen ǵımarattarǵa eleýli materıaldyq nuqsan keldtirildi. Lańkestik aktilerdi jarylǵysh quraldarmen jabdyqtaǵan avtomobılderdegi eki ekstremıst-jankeshti júzege asyrdy.

«Jergilikti ýaqytpen 9.00-de  jankeshti mıkroavtobýs rýlinde otyryp, Ál-Arkýb aýdanyndaǵy ishki áskerler kazarmasynyń aldyndaǵy kedergige soqtyǵysyp, jarylǵysh qurylǵyny iske qosty», - delingen sırııalyq densaýlyq saqtaý mınıstrliginiń habarlamasynda. Shabýyl saldarynan 11 adam qaza boldy, 130-y jaraqat aldy.

Birneshe mınýttardan keıin ekinshi lańkes áskerı barlaý kesheniniń aýmaǵyna mıkroavtobýspen kirýge áreket jasap, lańkestik aktini júzege asyrdy. Onyń nátıjesinde 17 adam qaza boldy, 105-i jaralandy. Olardyń arasynda áskerıler, beıbit adamdar jáne onyń mańyndaǵy saıabaqta oınap júrgen balalar boldy.

Sırııanyń syrtqy ister mınıstrligi BUU Bas hatshysyna, BUU Qaýipsizdik keńesiniń tóraǵasyna, Islam yntymaqtastyq Uıymynyń bas hatshysyna, Arab memleketteri lıgasynyń bas hatshysyna jáne BUU adam quqyqtary jónindegi joǵarǵy komıssaryna Aleppodaǵy lańkestik aktige qatysty joldaý jasady. Onda jasalǵan lańkestik aktiler Sırııaǵa qarsy naýqan aýqymynda aımaqtaǵy keıbir elderdiń qarjylyq qoldaýymen jáne tanymal BAQ-tardyń arandatýymen jasalǵany atap ótilgen.