Sırııadaǵy hımııalyq qarýdy joıý boıynsha jumys bastaldy
ASTANA. 1 qazan. QazAqparat - Búgin Sırııadaǵy hımııalyq qarýdy joıý boıynsha jumys bastaldy, dep habarlaıdy 24.kz saıtynan.
Birikken ulttar uıymynyń sarapshylar toby tergeý isin aıaqtap, arab elinen ketken bolatyn. Endi olar istiń qorytyndysy týraly esepti qazan aıynyń aıaǵyna qaraı usynady. Birikken ulttar uıymynyń resmı ókili Martın Nesırkıdiń aıtýynsha, halyqaralyq qaýymdastyqtyń aldynda ýly zattardy qoldanǵandardy anyqtaý mindeti turǵan joq. Bul úshin Birikken ulttar uıymyna múshe elderden jańa mandat berilýi tıis.
Esterińizge sala keteıik, Birikken ulttar uıymynyń qaýipsizdik keńesi 28 qyrkúıekte Sırııadaǵy hımııalyq qarý boıynsha qarardy qabyldady. Bul qujat Sırııa bıligi men oppozıtsııasyn jappaı qyryp-joıatyn qarýdy joıý josparyn oryndaýǵa mindetteıdi. Al oryndalmaǵan jaǵdaıda, áskerı kúsh qoldanylady.
