Sırııadaǵy birneshe qazaqstandyq elge oralý týraly ótinish jasady - SІM
ASTANA. 9 shilde. QazAqparat - Soǵys órtine oranǵan Sırııadaǵy birneshe qazaqstandyq elge oralýǵa kómek surap, ótinish jasady.
Bul týraly búgin Syrtqy ister mınıstrliginde ótken brıfıng barysynda vedomstvonyń resmı ókili Altaı Ábıbýllaev málim etti.
«Búgingi kúni Sırııada ýaqytsha jáne turǵylyqty turyp jatqan qazaqstandyqtardyń sany 150 adamdy qurap otyr. Olardyń basym bóligi Sırııa azamattarymen nekede turǵandardy quraıdy. Sońǵy málimetter boıynsha osy eldegi 50-den astam Qazaqstan azamaty Otanyna oralǵan bolatyn. Taǵy birneshe azamat týǵan jerlerine oralýǵa kómek kórsetý týraly ótinish jasap otyr», - deıdi A. Ábıbýllaev.
Onyń aıtýynsha, Úkimetten qarastyrylatyn qarajatqa sáıkes, olardyń bárine kómek beriletin bolady. Bul rette resmı ókil Qazaqstannyń Iordanııadaǵy Sırııa jónindegi dıplomatııalyq ókildigi elimizdiń azamattarymen udaıy baılanysta ekendigin málimdedi.
